No mester ataca e “trias política”, pero sigur no por permiti un ‘trias política’ partidista politicamente

Pa: Victor (Toko) Winklaar

Den un declaracion duna nan prensa, Hues di Prensa, mr Debby Angela a atende cu e forma con ta criticamente e forma di procede di entre otro Ministerio Publico y Landsrecherche, caminda a papia di persecución político den e caso Avestruz.

Pa gran parti por bisa cu Hues Angela tin rason, ya cu no mester mishi cu e poder hudicial ya cu e ta base di democracia di e pais, pero na mes momento ta bon pa su persona tambe realisa, cu ta net e base importante aki di nos democracia, t’esun prome yama pa no crea duda den e sistema cu accionnan cu ta cuestionabel den su forma di procede.

Ta di dos eleccion tras di otro cu parti di e poder hudicial a bin ta hungando un rol den un proceso electoral sea hustifica of no, pero den e caso di Avestruz, ta un Fiscal a reacciona riba pregunta di abogado di Parlamentario Benny Sevinger, kende a pidi algo di claridad riba e proceso cu su cliente ta pasando aden.

Aki tambe ta papia di un miembro di e Trias Politica aki cu Hues Angela ta menciona, ya cu Benny Sevinger ta forma parti di e poder legislativo y mas ainda tin cu proteha e institucion aki tambe y no crea duda den un proceso cu ta mustra cu tin politica meti den dje.

Fiscal den su carta na abogado David Kock a mustra cu te n’e momento cu el a ricibi e carta, no tin ningun keho oficial contra di su cliente y cu e proceso ta canando, esta investigacion ta tumando lugar, pero cu e ta kere, esta e Fiscal, cu pa luna di september ainda, lo no t’asina leu pa  bisa cu por formula acusacion contra di e Parlamentario.

No ta ningun politico a scirbi e carta aki, pero algun dia despues, ata ta sigui Benny den auto, ta bay na un lugar publico pa detene su persona pa intergoracion, despues tur hende a ripara un tipo di “versnelling” den henter e proceso aki.

A piki cantidad di hende, a kita nan libertad for di nan, a laga nan bay, a retene sospechosonan pa casi 50 dia pa finalmente bay over na detene e Parlamentario hunto cu su casa, loke ta bolbe lanta e sospecho cu e caso aki a haya un tinte politico.

Hues Angela tin rason, mester respeta e trias politica, pero t’e propio institucionnan aki tin cu percura pa nan no crea duda den nan integridad, den nan forma di procede ya cu ya caba na 2017, e caso di Paul Croes a hunga un rol den e proceso electoral y awor net despues cu Minister Presidente Evelyn Wever Croes a dicidi di baha su Gobierno y adelanta eleccion, di repente Ministerio Publico a drenta den “high gear.”

Na mes momento Hues Angela tambe mester ta consciente cu mientras cu tin cu defende e importancia di e trias politica aki, ta mes importante p’e mesun trias politica aki tambe realidad cu nan poder no ta infinito, cu nan no ta forma un tipo di dictadura caminda nan por haci y deshaci con cu nan kier, ki ora cu nan kier.

INFLUENCIA

N’e momentonan aki y ta di spera cu Hues Angela y coleganan tambe ta mira e parti aki, e caso di Avestruz lo no keda cla pa yega Corte di Prome Instancia pa tratamento prome cu 25 di juni cu ta Dia di Eleccion.

Un mucha chikito lo compronde cu detencion di Parlamentario Benny Sevinger ta afecta e proceso aki pa su partido y pa su persona cual ta habri caminda cu prolongacion di detencion di e politico, lo continua ya cu Ministerio Publico  y Landsrecherche cu ta forma parti di e trias politica aki,  lo no kier perde cara.

Ta un hecho cu si laga Benny Sevinger liber prome cu fecha di eleccion, e impacto politico lo ta inmenso pa su persona y lo ta devastador pa tanto e dos institucionnan aki,  ya cu nan lo ser acusa cu mas forsa ainda, di metemento den e proceso electoral.

Loke a spera cu Hues Angela lo a haci den su conferencia di prensa, ta di mustra cu e bishita di Prome Minister siman pasa na Ministerio Publico, no tabata necesario sigur mira tur loke ta wordo bisa y sospecha, ya cu su bishita a bolbe duna e impresion cu e mandatario y lider di MEP, ta hibando politica den un campaña electoral pa Ministerio Publico.