No ta 200, pero cerca di 1000 trahador publico tin cu wordo manda cas pa cumpli cu Landenpakket

Faltando net tres siman pa eleccion 2021 tuma lugar, keto bay no tin mucho claridad kico ta spera pueblo dentro di algun luna, ora cu realmente ehecucion di e Landenpakket, acorda dor di Minister Presidente y lider di MEP, Evelyn Wever Croes, tuma lugar.

Ora cu funcionamento di COHO bira ordo di dia p’asina pueblo por haya sa kico ainda e tin cu duna, kico ainda lo kita for di dje, kico ainda nan tin cu sacrifica y cu ainda tin hopi asunto cu no a wordo divulga riba e Landenpakket aki.

E decision di e lider di MEP pa baha su Gobierno na luna di maart ultimo, a ser considera un forma di gana tempo, di evita cu e tin cu bay over na ehecuta e medidanan cu el a acorda  y cu e momento a yega pa inroduci esakinan.

Cu Aruba sin Gobierno y su Gobierno demisionario, no por a bay over na ehecucion di esakinan y ta algo cu e lider di MEP a considera cu e lo ta devastador pa su oportunidad pa bolbe den Gobierno, pero e tempo aki ta cabando y cu introduccion di mas medida, ta cuestion di algun dia, di algun siman.

Mientras cu constantemente e lider di MEP y otro miembronan di su partido ta sigui nenga cu retiro masal lo cay den e aparato publico, ta un hecho cu Evelyn a acorda y forma ya for di 2018 caba, cu e tin cu reduci personal den e aparato gubernamental, pero nunca a ehecuta esaki.

Awor den porta di eleccion e no ta mira factibel pa bay over na haci esaki tampoco, pero den e Landenpakket ta para bon cla cu Gobierno di Aruba tin cu reduci gasto di personal y inicialmente a ser mustra cu e grupo cu tin cu bay cas lo ta entre 150 pa 200 trahador, pero awor ta bin resulta cu loke Evelyn a acepta y acorda den e Landenpakket, ta retiro di cerca di 1000 trahador den e aparato publico.

Fuera di e retiro masal aki, e decision di e lider di MEP pa cancela e medida riba remedi pa pueblo, caminda ciudadanonan mes tin cu paga pa gran parti di nan remedinan, ta bin resulta cu e cancelacion aki ta algo temporal, algo pa no perde cara politico y cu dentro di poco asina cu eleccion ta tras di lomba, lo re-introduci e medida aki, ya cu ta algo cu el a acorda tambe cu Hulanda.

Ta un hecho cu tur luna mester reduci gasto medida cu 5 miyon florin y esaki pa aña mester ta 60 miyon, pero ya a tuma medida caba den e servicio cu dokternan tin cu duna na comunidad, pues den e rumbo ey no tin espacio cu por tuma pa cubri loke a wordo cancela temporalmente. Un retiro masal ainda ta sin duda fuera di tur proporcion y sigur hopi delicado y peligroso mirando e impacto  cu esaki lo crea y tur cos ta mustra cu Evelyn e lider di MEP tambe ta na altura di e impacto aki, pero asina mes el a sigui dilanti y sin hiba dialogo cu ningun instancia of gremio aki na Aruba y sin hiba dialogo sikiera pa mustra cu el a haci un intento pa evita algo asina drastico, el a pone su firma bou di e acuerdo aki den nomber di pueblo.