Resumen di Premio Nacional di Teatro otorga pa Departamento di Cultura Aruba

Manera ta custumber, tur aña Departamento di Cultura Aruba ta organisa e actividad teatral di mas grandi na Aruba cu ta relaciona cu Celebracion di Dia Mundial di Teatro. Anexo n’e programa di celebracion, cada aña ta otorga e Premio Nacional di Teatro na un persona, grupo of fundacion cu a traha y cu a contribui grandemente cu e desaroyo di teatro na Aruba.  

Pa loke ta trata e aña 2020, na unda nos a confronta cu’n aña di Pandemia; no por a haci e celebracion aki, motivo pa cual a opta pa otorga e Premio Nacional di Teatro “Reconocemento Special di Bida Largo” e aña aki na: Cas di Cultura Aruba’s Cultural Plataform since 1958, pa su Celebracion di mas di 60 aña na servicio teatral, tur aporte, congreso y proyectonan asina balioso den cooperacion pa lanta arte di tarima aki na Aruba y pa nan reconocemento y trayectoria, tanto na nivel  nacional como internacional. 

Na aña 2021, a ser otorga e premio aki n’e Directora, Actriz y Escritora di Teatro, sra. señora Lenie Jeandor, pa su trayectoria y excelente aporte den e mundo teatral y p’e valioso publicacion di su 2 buki: “Manual pa Escenario”. 

Algun di e Premionan aki otorga den pasado tabata lo siguinete: Na aña 2005, A tuma lugar e prome Celebracion di Dia Mundial di Teatro y a presenta full un siman teatral, na unda e grupo di teatro local MASCARUBA a bay cu e prome Premio Nacional di Teatro, como reconocemento pa nan 44 aña di existencia den e aña ey y p’e trabao incansabel y p’e desaroyo di teatro den nos comunidad y nan representacion na nivel nacional y internacional.  

Ademas e grupo aki a lanta for di mesun aña cu a tene e celebracion aki, mundialmente. 

Na aña 2006, e autor, critico, actor, periodista y director di teatro señor Juby Naar, a bay cu e reconocemento aki bon mereci pa su valioso aporte y añanan di experiencia den e area artistico aki, contribuyendo grandemente den e mundo teatral den nos comunidad. 

Na aña 2007, e maestro, directora y actriz señora Amy Lasten a haya e reconocemento aki pa su incansabel aporte y trayectoria trahando specialmente cu hoben y su dedicacion como maestro di teatro. Ademas señora Lasten a traha, durante su funcion di encargado di e Seccion di Teatro na Instituto di Cultura Aruba, diferente tayer y festival, manera FESTESECO cu a crea un impacto exitoso plantando un simia grandi den curason di diferente hoben cu awendia ta desaroyando nan mes grandemente den e mundo aki. 

Na aña 2008, e autor, director, actor y compositora señora Carmen Herrera y grupo teatral Kibrahacha a conkista e logro aki pa su añanan di experencia y representacionnan na nivel nacional e internacional, na unda a registra diferente obra den un forma magistral den un buki cu ilustracion y cantica cu a uza den cada obra. 

Na aña 2009, e autor, director y actor, señor Oslin Boekhoudt (dfm), a conkista e logro aki pa tur e añanan di experiencia y dedicacion pa cu teatro na nivel nacional y internacional. Un lista di cantidad di obra a ser dirigi exitosamente pa su persona, ademas di a gana e confiansa y respet di hopi hende cu a consider’e e Tata di Teatro na Aruba. 

Na aña 2009 tambe a ser entrega e “Reconocemento Special di Teatro di Bida Largo” cu cada lustro lo ser otorga na un persona, cu a dedica henter su bida na servicio di teatro, pa su trabao, sacrificio y aporte den e campo teatral.

Pa prome ocacion, e tecniconan di Cas di Cultura Aruba, señor Richard Hopmans  y señor Rolande Bryson a bay cu e codiciado y excelente titulo aki. 

Na aña 2010, e reconocemento aki a ser duna n’e Presidente Internacional di Teatro Amateur: señor Leo Tromp, kende tambe a fungi pa hopi aña como Presidente di IATA y FUNDARTE.  

Na aña 2011, e reconocemento aki a ser duna na e comediante sr.Vale Croes, (dfm), kende tambe a celebra su 50 aña como un di e mihor comediantenan na Aruba. 

Na aña 2012, a keda na nomber di: drs. MIRTO LACLE, GESTOR CULTURAL,  “Un homenahe na cultura y cuentanan di Compa Nanzi, 1952 pa 2012” y cu e proyecto y ciclo multidisciplinario presenta na Cas di Cultura den luna di maart 2012 titula: CAS DI CULTURA COMBERTI DEN CUEBA DI COMPA NANZI” cu a encera 4 proyecto den uno. 

Na aña 2013, a ser otorga e premio akin a señora Diana Antonette, den su Hubileo di 45 aña di actriz y 30 aña Directora di Teatro di Danza Arubano. 

Na aña 2019, despues di 10 aña lo otorga e Premio Nacional di Teatro “Reconocemento Special di Bida Largo” n’e actriz, comediante, productor, escritor di teatro, sra Faritah Luidens cu su celebracion di 50 aña den farandula cu su mega produccion “Ken ta Basha Abou” presenta conhuntamente cu Cas di Cultura na unda a resalta su personahe Tica Basha Abou cu su persona ta representa y tambe den e mesun rosea duna 5 Reconocemento Special na 5 grandi veterano di teatro cu lo ta trahando directamente cu Faritah Luidens den su produccion manera ta: Luty Martinez, Yvonne Spellen, Magda Nicolaas, Harold Pereira y Elsa Krosendijk.  

Masha Pabien na tur persona cu ta forma parti di e lista aki y tambe nos ta spera cu pueblo por duna libremente e recomendacion p’e Premio aki cu lo ser entrega na aña 2022.  Manda boso peticion cu e motivacion di e nominacion y biografia di e persona, organizacion, maestro, actor, productor, grupo escritor, etc, na Departamento di Cultura Aruba y ban sigui duna reconocemento den bida na tur protagonista cu ta traha incansabelmente pa mantene e arte di teatro na halto.