Tin mas “mucha” canando cu arma den grupo y matando otro

Comunidad ta den shock cu asesinato di un mucha muher di apenas 20 aña kende diabierna madruga a wordo haya den sala di su cas, c’un tiro den cabes, mientras cu diasabra autoridadnan a bay over na detencion di dos hoben di 17 aña relaciona cu e asesinato aki.

Loke ta mas tristo di henter e asunto aki, ta cu e ta otro muestra di un serie di caso di asesinato di e aña aki ( 5 en total te awor), caminda bida di hende, no tin balor y algún tipo sin escrúpulo ta dicidi di pone fin na bida di un ser humano sin hustificacion algún.

Ya caba e impacto di morto di un damita asina hoben tabata grandi, pero ainda mas impactante ta e hecho cu tin dos menor di edad envolví, hobennan di solamente 17 aña cu a bin haya nan mes awor den un situacion sumamente serio.

Sinembargo e tipo di crimen aki, a cuminsa lanta cabes pa un tempo caba, crimennan caminda arma di candela y arma blanco ta wordo usa y cu ta confirma un situacion social y criminal cu Aruba nunca a experiencia den su historia.

Un situacion social caminda ta bisto cu comportacion di hobennan den nos comunidad, ta basta for di control y sin cu ta mira cu algo ta ser haci al respecto.

Gabinete Wever Croes sin duda a faya den su maneho social y criminal den e periodo di gobernacion cu ta cavando, caminda den compaña electoral na 2017, a mal usa morto di dos criatura inocente, como ehempel di un deterioro social y caminda a sigura pueblo cu e Gobierno di MEP aki, lo introduci un plan social pa alivia e presión grandi aki riba comunidad.

Sinembargo awe dia 7 di juni 2021, e plan social nunca a lanta cabes, nunca a funciona y nunca a wordo introduci.

Riba tereno hudicial tambe Gabinete Wever Croes a faya formalmente, sigur ora cu e actual Minister di Husticia demsionario, Andin Bikker na su introduccion, a sigura pueblo cu e tin un plan pa caba cu criminalidad, pa reduci e total di casonan criminal den forma significante.

Awe mesun Minister Bikker aki ta cabando cu su periodo como Minister, ta bezig ta “ruin op de boel” den su ministerio, ya cu dentro di poco e ta for di gobernacion y ta for di política.

Bikker ta bay sin por a hinca un maneho efectivo den otro, a perde cantidad di tempo nombrando un of otro Hefe di Polis, a para mira con hobennan ta bayendo un rumbo robes y nunca a mustra su convivencia c’un pueblo cu ta bibando mey mey di angustia pa tanto violencia den comunidad.

Hobennan ta canando arma, caminda tin varios caso cu Polisnan a logra di detene varios di nan, pero esaki no a reduci e circulación di arma den e grupo di hobennan aki y ainda por corda un caso caminda un damita hoben a pasa los tiro den Rancho y a herida mortalmente e conocido  figura Skeet.

Loke mester tabata un chansa a resulta den algo fatal cu e hoben aki mes a lamenta profundamente y cu a cambia su bida tambe y tin otro hobennan cu tambe a bin haya nan mes den problema serio cu husticia pa motibo di tabatin arma den nan poder.

Pa algun tempo caba tin un serie di caso di hobennan cu ta regla cuenta cu otro, sea cu arma blanco of arma di candela te cu morto a cuminsa cay, pero e trend aki ta continuando cu e tiramente sin sentido di e hobencita Petronia diabierna madruga.

Gabinete Wever Croes ta bayendo cas, sin por a cumpli cu otro di su promesanan y aki tin cu mustra den e programa di gobernacion di partido MEP di 2017, un di e prioridadnan di e partido aki, tabata pa “combati criminalidad’  loke n’e momentonan aki pueblo sa y ta sinti den carni propio, no a surti efecto.

Ta di aplaudi sin duda e gran trabou di autoridadnan policial cu ta detene dos sospechoso asina rapido, pero bou di ningun circunstancia esaki lo alivia e presion grandi cu tin den comunidad aworaki, pa tanto violencia arma.