Varios unidad policial a bay Calbas pa pelea formal dilanti un bar restaurant

Diasabra den oranan di merdia pa mas o menos 3’or varios unidad di Polis a wordo manda dilanti 99 Bar Restaurant (ex Golden Buddha) pa un pelea grandi.

Na yegada di prome patruya, ya esnan cu tabata bringando a bandona e sitio, Polisnan por a constata boternan kibra riba caminda. Agentenan n’e sitio a acerca habitantenan cu a presencia tur cos.

N’e sitio nos tambe a papia cu testigonan. Segun nan version taata un bringamento formal entre dos grupo. No por bisa si nan a topa otro pa casualidad eynan of si nan tabata sigui otro.

Di un otro angulo habitantenan a conta Polis cu nan lo a mira un arma di candela, riba un di esnan bringando.

Polis a tuma tur dato y tambe locual hopi hende no ta lubida, cu na mayoria establecimiento tin Security Cameras. Pues Polisnan tin un bon bista di kico tur a pasa y tambe e vehiculonan envolvi.

Por spera mas problema entre e personanan aki.