Aruba Investment Summit 2021 tabata un exito rotundo

‘Aruba Investment Summit 2021’ organisa dor di Departamento di Asunto Economico, Comercio y Industria (DEZHI) tabata un exito rotundo. E cumbre a tuma lugar dianan 31 mei, 1 y 2 juni 2021. Durante e evento aki tabatin presentacionan interesante di Aruba su top lidernan, ehecutivo y empresarionan y tambe oradornan internacional cu a inspira y a motiva e participantenan.

E tres dianan di evento a tuma lugar por medio di un plataforma digital y a ricibi un acogida di diferente participante rond mundo, incluyendo Reino Hulandes, Europa, Caribe, paisnan Latino Americano, Estados Unidos. Un total di 366 participante a registra, cu 69% di asistencia. E participantenan a duna e evento un score di 8.5 for di 10.

Resumen di Aruba Investment Summit 2021

Riba e prome dia di e Summit, e participantenan a ricibi un caluroso bon bini di Minister di Finansa, Asunto Economico y Cultura, sra. Xiomara Maduro. Tambe e mandatario a lansa e logo y e branding nobo di Aruba Investment Promotion Agency (ARINA), cu awor ta un unidad di Departamento di Asunto Economico, Comercio y Industria.

Finalmente e mandatario a subraya e deseo pa pronto yama e particantenan Bon Bini na Aruba y pa hunto logra pa Aruba bira ‘One Happy Investment Island’.

Tambe a hiba palabra Director di DEZHI, sra. Maria Dijkhoff-Pita kende a presenta e sectornan prometedor di Aruba. Managing Partner di MGM Source, sra. Marielsa Croes a elabora riba e clima di inversion di Aruba y sr. Daniele Ferrara, CEO di Gianni’s Group a elabora riba su proyectonan sostenibel y diversifica cu el a inverti aden.

Riba e di dos dia, CEO y CCO di Aruba Ports Authority, sr. Marc Figaroa y sr. Lex de Ridder a presenta e proyectonan ‘Port City Oranjestad’ y ‘Barcadera Business Park’. CEO di Aruba Airport Authority, sr. Joost Meijs, conhuntamente cu sr. Shensly Tromp, Director di Airport Development & Technology a presenta ‘Aruba Gateway 2030’ y un proyecto inovativo di Aviacion Electrico.

Sr. Eric Mijts, coordinador di SISSTEM na Universidad di Aruba a elabora riba e solucionan inovativo pa islanan y sr. Martin Berkenkamp, representante di e grupo di empresanan Aleman GreenHub Technology a duna su testimonio tocante establecimento di un proyecto di inversion na Aruba.

E ultimo dia di Summit, sr. Brad J. Sugars, Fundador y CEO di e compania ActionCOACH a duna un discurso referente ‘disruptive entrepreneurship’. Sr. Remko van der Veldt, Managing Director di Royal Aruba Aloe a elabora riba e strategianan pa internacionalisa cu su compania a practica ultimamente.

E ultimo orador, sr. Andrei Moarcas di OCTA a presenta e estudio referente e implementacion di ‘Blue Economy in island economies’.

Prome Minister di Aruba, sra. Evelyn Wever-Croes a presenta un impresionante discurso pa clausura e Summit aki, na unda el a enfatisa cu Aruba ta cla pa yama bon bini na inversionistanan nobo pa nos isla Aruba.

Resumen di e Summit

Durante e cumbre, e participantenan a haya informacionan valioso con pa inverti na Aruba, tambe a cera contactonan importante y a wordo inspira pa inverti na Aruba dor di e diferente oradornan. P’esnan cu ta interesa pa wak Aruba Investment Summit 2021, e videonan ta riba YouTube riba e canal di Departamento di Asunto Economico, Comercio y Industria.

Pa mas informacion of pregunta

Pa mas informacion tocante Aruba Investment Agency (ARINA), por tuma contacto cu sra. Zuleika Quant na DEZHI via email z.quant@deaci.aw.