Aruba Marriott a organisa un ‘Job Awareness Day’ pa su asociadonan

Recientemente Aruba Marriott a organisa un ‘Job Awareness Day’ pa tur asociado di Aruba Marriott, unda diferente departamento a setup nan booth den e Grand Ballroom di Aruba Marriott Resort p’asina comparti y intercambia informacion cu otro di con cada departamento ta funciona y alabes promove e posicionnan habri den cada area.

E evento aki a wordo organisa cu meta pa crea concientisacion di cada departamento rond di e complex di Aruba Marriott y asina promove crecemento interno y oportunidadnan pa desaroyo.

Por medio di e evento aki, asociadonan a haya e oportunidad tambe pa por discubri pasion y interesnan nobo den nan carera. Alabes, tur asociado cu a demostra interesa pa crece den un area specifico, a haya e oportunidad pa traha un plan di desaroyo hunto cu Departamento di Human Resources, p’asina por yuda cada asociado yega na nan pasion.

“E ta sumamemente importante pa nos asociadonan tin e oportunidad pa crece internamente y sigi desaroya durante nan carera na Aruba Marriott y ta p’e motibo aki nos ta organisa actividadnan manera e ‘Job Awareness Day’ p’asina duna nan e instrumentonan necesario pa prepara nan mes p’e siguiente etapa den nan carera”, a comparti Ruthline Theysen, Complex Director di Human Resources.

P’esnan cu ta desea di forma parti di e famia di Aruba Marriott, por bishita careers.marriott.com pa aplica p’e posicionnan disponibel.