Fysiotherapistanan preocupa pa nan participacion profesional especifico den nos Cuido Medico

Recientemente Arubaanse Vereniging van Fysiotherapeuten (AVF) den nan preocupacion pa Salubridad en General y nan profesion di Fysiotherapista especifico, a manda un carta y preguntanan pa tur Partido Politico pa por zondia y haña sa kico nan por spera den e siguiente Gobernacion di cualkier un di e partidonan cu lo drenta den Gobierno por lo pronto.

Pa hopi aña, e Fysiotherapistanan ta sinti cu nan trabou sa wordo menosprecia dor cu e impresion ta/tabata biba cu nan tey pa masashi hende so; esaki ta leu di t’e contenido di nan profesion. Husto durante e Pandemia actual, e Fysiotherapistanan tin nan man yen cu tratamentonan di pashentnan cu problemanan respiratorio en general, pashentnan cu a haña COVID, esnan cu pa hopi aña no a haci (suficiente) ehercicio y ta experienciando e efectonan di “im-mobilidad” awor.

Diariamente, mas y mas y ta wordo comproba cu e fysiotherapista su ayudo, di berdad, ta extenso.

Nan ta specialisa p.e. den yuda, guia y stimula esnan cu NO ta move; of dor di cualkier keho/lesion no por haci esaki.

E Fysiotherapista ta sostene en pashent(nan) en cuestion pa siña  move (bek) riba un manera responsabel. Esnan cu tin otro kehonan manera cardiatico, circulatorio of neurologico (acompaña cu of sin dolor) ta wordo atendi debidamente cu e conocemento y practica di e Fysiotherapista.

Banda cu e Fysiotherapista por eherce su trabou riba e tereno curativo (dolor di joint, musculo of despues di un operacion etc.) nan por contribui grandemente tambe n’e parti preventivo, cu consecuentemente ta aporta na mantene e gastonan di salubridad abou, y controlabel. Esaki ta conta primordialmente pa malesanan chronico manera Diabetes Mellitus, Obesitas y tambe sufrimento di arthrosis y hernia (pa menciona algun).

Continuando y concluyendo, mundialmente poblacionnan a crece, incluyendo Aruba, y hunto cu esaki un diversificacion di malesa y dolencianan a desaroya cu mester di tur grupo den sector medico pa asisti e pashentanan y traha hunto na bienestar y salud di e pashent.

Niun grupo medico ta indespensabel; ta costa un TEAMWORK pa yega n’e resultado positivo di e pashent su tratamento medico.

Cu nan pensamento y visionan prepara, e Fysiotherapistanan, ta en espera con nan lo por sigui contribui efectivamente na nos salubridad y sigui trata nan pashentnan cu animo y dedicacion.

Siguiente e preguntanan cu nan a dirigi n’e Partidonan Politico:

  1. Kico, segun Bo persona/Partido ta e importancia di Fysiotherapia den nos Salubridad di Aruba pa e pashentnan? Ki balor Bo persona/Partido ta pone na Fysiotherapia na Aruba?
  2. Mas y mas ta conoci cu prevencion y stimulacion di movecion, y un bida saludabel, por baha e asistencia di cuido medico specialisa. Con Fysiotherapia por contribui n’esaki?
  3. Nos hendenan ta birando mas grandi mundialmente y tambe na Aruba.

              Den pasado e pakete di cuido na Hulanda a minimalisa tratamentonan di

              Fysiotherapia, y momentariamente e peticion pa Fysiotherapia na Hulanda ta

              Creciendo mas y mas y ta ser mira y studia con pa amplia e pakete pa hasi 

              Fysiotherapia mas accesibel awor y pa futuro atrobe.

              Estudionan hasi recientemente ta duna di conoce cu Fysiotherapia por aporta na

              mantene e cuido mas pagabel, cu menos gasto (especialmente tratamentonan di e

              pashentnan chronico) y tambe pa preveni tratamentonan caro innecesariamente.

              Con y of kico Bo persona/Partido lo haci pa mantene Fysiotherapia

              vigente/valido y sin limitacion (dus tratamento di kehonan urgente y chronico)

              den e pakete di AZV?

  • Di 2001(inicio di AZV) pa 2021, Fysiotherapistanan ta conta cu un maximo constante di tratamento pa aña pa Fysiotherapista siendo cu e populacion di Aruba a crece.

Si Bo Partido lo participa den e siguiente Gobernacion, e Fysiotherapistanan di Aruba y nan pashentnan por conta ariba dje cu Bo partido lo bay haci su posibel pa amplia e cantidad di tratamento cu ta wordo poni na un limite pa aña p’e fysiotherapistanan (pa casi 20 aña caba), p’asina por tin un continuacion di tratamento sin interupcion?

  • Si Bo Partido lo tuma e encargo di Ministerio di Salubridad, e Fysiotherapistanan lo haña oido y tambe lo por participa den discusionan y decisionnan pa cu tratamentonan preventivo y curativo pa locual ta incorpora den nan profesionalidad?

Pakico of cu ki razon Fysiotherpistanan, y kizas nan pashentnan, lo mester vota pa Bo persona/Partido den e eleccion benidero?