Lucha den propio seno di candidatonan ta birando problema grandi pa partido MEP

Partido MEP ta den pleno campaña electoral, pero ta confrontando problema den nan propio seno, pa loke ta wordo catalga den a arena político como “canibalismo político.”

AWEMainta por a comprende cu esaki ta un terminología cu ta wordo usa den seno di partidonan político ora cu e propio candidatonan ta bishita sostenedor di otro p’asina convence e votadornan pa duna nan e sosten cu nan tin intencion di duna otro.

Ya caba AWEMainta a trata e tema di e lucha cu tin entre líder di e partido Evelyn Wever Croes y Dangui Oduber, kende a converti su mes den un forsa político independiente den seno di e partido geel, caminda ta mira e tendencia aki den ultimo dianan, p’asina  logra mas tanto voto.

Tin varios caso den fin di siman caminda campañadornan di e dos candidatonan aki, a bishita cas di sostenedornan di otro, tratando na cambia nan pensamento riba kende nan deposita nan voto dia 25 di juni próximo.

Siman pasa a sosode un incidente na Noord caminda campañadornan a hiba material pa un famia cu tabatin bandera y borchi na su cas pega caba y a bin haya un otro grupo di otro candidato di partido MEP n’e cas promoviendo nan candidato, loke a conduci den un confrontacion verbal.

E tipo di incidente aki a sosode tambe na Santa Cruz e fin di siman tras di lomba caminda na diferente cas, candidatonan a bin topa cara cara cu otro, nan tur luchando pa haya voto di mesun famia.

Un situacion cu ta demostrando cu e partido geel ta luchando formalmente pa trata di retene algo di loke e partido a logra den eleccion di 2017, pero mirando e periodo di gobernacion cu Gabinete Wever Croes a hibando, caminda pueblo a wordo afecta negativamente pa un serie di medida tuma, awor ta haya rechaso cerca mesun votadornan cu a sostene e partido na 2017.

Den otro incidente cu a sosode den fin di siman, AWEMainta a wordo informa di un confrontacion fisico entre campañadonan di dos partido, caminda un partido cu a caba di pone bandera siman pasa, a bin tuma nota cu a baha nan bandera y e bira pone un otro bandera di un otro partido politico.

Ta di spera cu den proximo dianan segun e fecha di eleccion ta yegando, cu lo por tin mas di e confrontacionnan politico aki y ta di spera cu tur hende por respeta escogencia di otro y evita cu ta duna un ehempel di agresion politico sin cu esaki ta necesario.

Varios partido politico a tene actividadnan den fin di siman y esakinan lo bay aumenta den proximo dianan, sigur awor cu a elimina e gebiedsverbod caminda partidonan por reuni pa grupo grandi di simpatisantenan den e ultimo tres simannan aki prome cu eleccion.

Partido AVP cu su festival di sopi na Pos Chikito, a acapara hopi atencion no solamente di su simpatisantenan, pero henter un region di Cuerpo Policial tambe a bay staciona n’e sitio aki net bou di e brug, pa controla e musica halto y controla cu no tin parada di auto tumando lugar. Sinembargo tur cos a cana bon, a bay den un bon ambiente y tur cos a bay sin incidente.