Parse ku táktika ta pa Banko Sentral bende tur propiedat lokal di Ansari

WILLEMSTAD – Konosédonan dje materia kompliká di invershon finansiero lokal ku e empresario di origen Iraní, Hushan Ansari, algun dékada pasá kumprando tres empresa finansiero pa salba nan ora ku nan tabata halando nan ultimo rosea, ku un gran interogante ta siguiendo e drama rond dje propiedatnan aki.

Esensia dje problema di Ansari ku Banko Sentral ta ku Banko Sentral ku tin supervishon riba tur institushon finansiero den nos pais, a tilda Ansari ku su kompania Parman International B.V. a saka komo 1500 miyon florin for di ENNIA dor di laga ENNIA I su sukursalnan inverti den kompanianan filial di Parman ku yama Stewart & Stevenson Inc.

Otro reklamo di Banko Sentral ta ku e propiedat di Mullet Bay na Sint Maarten ku ta aparesé den buki di e kompania pa un balor di 771 mion florin, lo ta bal solamente 89 mion florin.

Despues ku Ansary a laga saka 100 mion dòler for di ENNIA ku despues el a retorná, Banko Sentral a pone ENNIA bou di estado di emergensia I pa kolmo un Korte Merikano a dikta ku Banko Sentral por disponé dje plaka.

Esei pasobra ta personal di Banko Sentral ta manehando ENNIA.

Aki na Kòrsou Korte a dikta veredikto den e kaso di Parman  International B.V. kontra Banko Sentral outorisando Banko Sentral pa disponé dje kapital di ENNIA.

Ku esaki korte a habri porta pa pa Banko Sentral konvertí tur propiedat di Parman (Ansari) pa kapitalisá ENNIA.

Un dje propiedatnan aki ta e tereno na Mullet Bay na Sint Maarten kual nan ta finalisando di fiha su balor pa por traha relato finansiero anual.

Parman (Ansari) ta akshonista di ENNIA Caribe Holding i Ansary tin mayoria di akshonnan.

Bou di ENNIA Holding ta kai: – EC Holding N.V. (Holding); -E.C. Investments  (ECI); – ENNIA Caribe Leven N.V. (ECL); – ENNIA Caribe Zorg N.V. (ECZ);

– ENNIA Caribe Schade N.V. (ECS).

Dia 3 di yuli 2018 Banko Sentral a revoká e lisensia dje kompanianan di seguro i a pone nan den estado di emergensia ku de fakto ta nifika ku ta Banko Sentral ta pone su hendenan manehá e kompanianan.

Komo motibu pa dikta estado di emergensia Banko Sentral a indiká ku Parman c.q. Ansari no ta sigi instrukshon di e kapatasnan ku Banko Sentral a nombra i ku Ansari a purba saka 100 mion dòler for di ENNIA via nan kuenta serka Merril Lynch na New York.

Korte no a duda ku e medida di emergensia ta nesesario. ENNIA tin 50% di merkado di seguro na Kòrsou i Sint Maarten. Ademas ENNIA tin 80 porshento di merkado di penshun.

Hues no por a bai di akuerdo ku e demanda pa anulá e medida di emergensia pasobra Banko Sentral no a aktua ilegalmente i si e kaso bai den Korte Sivil, ENNIA lo haña rason.

Tambe Hues a opservá ku den un veredikto di 18 di januari ultimo den e kaso dje kompanianan di seguro individualmente kontra Ansary, Parman, Nina Ansary, Abdallah Andraous, Ralph Palm i Gijsbert van Doorn a tene nan personalmente responsabel pa e daño finansiero i a ordená nan pa duna ENNIA tur dokumentashon.

Parman c.s. a hiba e kaso dilanti pa pidi Hues pa ordená Banko Sentral pa denter di un dia despues di tuma desishon prohibi Banko Sentral pa dekretá e medida di emergensia.

Anula e medidanan ku nan a tuma kaba i prohibi ENNIA pa bende propiedatnan di ENNIA.

Konhelá e medidanan ku ENNIA i Banko Sentral a pidi wes pa dikta kontra e direktornan te ora yega na un areglo final ku ta aseptabel pa tur partido. Na final Hues no a bai di akuerdo ku e demandanan aki.