SAPATO BIEU

Pa: Armand Hessels

Pa hopi tempo un amigo deportivo a cana riba e mesun sapatonan di hike di bon calidad. Nan tabata sinta bon, tabata apropia pa tur tereno, a proteha su enkelnan y e suelanan tabata resisti cualke obheto skerpi.

Pero segun tempo a pasa, e sapatonan a bira mas rigido y inconfortable. E suelanan a bira asina fini cu el a sinti cada piedra y sumpiña. Y ora e no por a nenga mas cu nan tabata causa mas daño cu placer, el a dicidi cu dolor den su curason pa despedi di nan y cumpra sapato nobo. Esakinan a cumpli mihor cu su deseonan.

ALTERNATIVA

Di mes esaki no ta conta solamente pa sapato. Pa tanto otro asunto sa pasa cu si nan no ta funciona debidamente (mas) y cu posiblemente tin mihor alternativa, ta mas sensato pa cuminsa cu algo nobo, maske con dificil emocionalmente.

Esey ta conta pa paña, auto, e sistema di enseñansa y tambe pa partido politico. Si despues di purba varios año a sali na cla cu e/nan no ta funciona (mas) como debe ser, y mas bien (t)a causa daño grandi na comunidad, ta bira mas cu tempo pa busca alternativa.

IMAGEN GENERAL

Desde comienso di añanan ’90 di siglo pasa, specialmente e dos partidonan grandi cu alternativamente tabata responsabel pa gobernacion di Aruba, a practica politica, c.q. hiba gobernacion di tal forma cu a viola e criterianan di bon gobernacion structuralmente. Tabata trata e.o. di e siguiente caracteristicanan:

Structuralmente a viola ley (p.e. Constitushon, Ordenansa di Contabilidad)

Structuralmente a neglisha e criterianan di bon gobernacion (p.e. transparencia, un administracion/maneho financiero drechi y nunca a responsabilisa e maneho financiero, p.e. pa medio di Cuenta Anual)

Structuralmente a neglisha advertencia/recomendashon (p.e. di RvA, ARA, SER, KvK, CBA, IMF)

Structuralmente a neglisha e consecuencianan financiero di maneho (debe y interes gigantesco)

Structuralmente a marginalisa e sistema di checks & balances

Indiferencia structural pa bienestar di comunidad (no a cumpli cu e ‘obligacion di cuido social’)

Enfoke structural riba e interes personal y di partido

Aprobacion structural di Parlamento manso pa (mal) maneho

CONSECUENCIA

Tur dos partido grandi a haci nan mes culpabel n’e caracteristicanan aki, mientras cu riba dje – un mas cu otro- sa viola e normanan di integridad (cu consecuencia di persecucIon penal). Di e manera aki, structuralmente a viola e estado di derecho, mescos cu e sostenibilidad financiero di autonomia. En realidad, riba tur dos tereno tabata trata di minamento sistematico.

A base di lo anterior por deduci cu e dos partidonan politico a abusa grandemente di nan poder: Cu nombramento inecesario/ilegitimo di personal, e aparente implementacion deficiente intencional di tecnologia efectivo pa baha gasto y mehora funcionamento di gobernacion; e manera dudoso cu a trata proyecto costoso di Gobierno (incluso e destaho deficiente y e falta di mantencion!); e negligencia di e deber di cuido social di Gobierno, tur esaki cu consecuencia financiero y social-economico serio pa Aruba. Cu tur e actonan ilegitimo y structural aki, a comete un inhusticia grandi pa cu comunidad.

EXPERENCIA GUBERNAMENTAL OF ‘STAGIARE’?

Asina mes, durante e campaña politico actual, e ‘tradicionalistanan’ ta mustra especialmente riba nan ‘experencia gubernamental’. Segun nan, e partidonan nobo cu ‘politico sin experencia’ mester pasa den un periodo di aprendisahe, den caso cu nan haya e responsabilidad pa goberna.

Pero mester ta cla cu e experencia gubernamental di esnan ‘bakia’ cu a hiba Aruba practicamente pa un bancarota cu fayo grandi riba hopi tereno, no ta un opcion aceptable. Pesey ta mas na su lugar pa acudi na ‘stagiares’ cu lo por haci un limpiesa total y lo por ehecuta concretamente e reformanan cu a neglisha ya caba pa decada y hustamente a keda blokea pa partido cu otro interes cu esun general.

Ademas ta parce cu e ‘stagiaresnan’ ta mas inclina pa duna un contenido positivo na e relashonnan den Reino. Responsabilidad di ciudadano y participacion di comunidad.

Mester ta cla tambe cu no ta solamente politico y partido politico cu mester reforma, pero tambe ciudadano y henter comunidad. Pasobra no tabata solamente ‘politica’ cu a malcomporta su mes. Ciudadano comun y coriente tambe, mescos cu comerciante, cu sa exigi privilegio exorbitante, ta mesun culpabel na exceso cu al fin y al cabo por hiba na -por ehempel- corupcion.

Pesey tambe ta boga den e Masterplan di e Gobierno di coalicion actual pa un campaña di concientisacion intensivo pa mustra ciudadano riba e consecuencianan negativo di patronahe politico.

Ciudadano tambe mester siña cu nan responsabilidad politico no ta cuminsa y di biaha ta caba cu e momento di tira nan voto na eleccion. Pasobra partido nobo (‘stagiare’) tambe no por duna ningun garantia cu no la actua di mala fe. E unico manera pa reduci e riesgo aki ta pa keda alerta como (organisacion di) ciudadano pa cu e funcionamento drechi di gobernante y parlamentario.

Por logra esey entre otro dor di duna comunidad mas participacion den e maneho general di pais, entre otro pa medio di e instrumentonan di panel di ciudadano y referendum.