DIMAS ta splica e proceso di citanan di asilo

DIMAS a tuma nota di un reportahe dialuna mainta den un medio di comunicacion encuanto un malcomprondemento di e proceso di cita na momento cu un hende ta pidi proteccion internacional (e.o asilo) na Aruba.

T’asina cu DIMAS ta atende personanan cu a haci un peticion pa cita of cu ta bin pa un entrevista referente un peticion di asilo personalmente. Ta importante pa reitera cu na momento cu un hende indica cu e tin mester di proteccion, cu mester scucha su relato  personal.

Pa cu esaki mester tene cuenta cu e siguiente puntonan di e proceso manera e ta aplicable na Aruba:

Un persona cu ta pidi asilo of cu ta bin pa un entrevista referente su asilo ta wordo scucha en persona.

DIMAS ta invita e persona cu anticipacion p’e por prepara pa su entrevista y trece tur loke e ta kere ta necesario pa cu esaki. Tene na cuenta cu e invitacion ta bin via di e coreo electronico cu e persona suminstra.

Ta importante p’e coreo suministra ta di e persona en cuestion mes y cu ta controla regularmente e coreo suministra.

Ta permiti solamente e persona cu cita pa atende e cita y drenta e edificio di DIMAS. No ta permiti pa tin otro persona/mas persona presente durante di e cita na DIMAS.

Ta conduci tur cita den e idioma di escogencia di e persona y tur documento presenta ta den e idioma di escogencia di e persona tambe. Cualkier documento cu ta wordo firma ta semper den e idioma di escogencia di e persona.

Ta considera personanan cu no atende nan cita sin un motibo valido, cu nan no ta interesa mas den nan peticion cu consecuencia cu e peticion por termina prematuramente.

Na momento cu un hende no por presenta na un cita, mester informa esaki por lo menos 48 ora adelanta y mester presenta motibo valido pa cu esaki. Si no tin motibo valido y e persona no presenta na su cita esaki ta wordo considera como un falta di interes pa su peticion cu e mesun consecuencia previamente menciona.

Ta reitera cu e procesonan di proteccion (asilo) ta procesonan boluntario, si un persona ta desea di tin representacion legal e por haci esaki riba su propio gastonan y pafor di e horario di su cita na DIMAS. Durante di e cita na DIMAS ta scucha e cliente so.

Despues di e proceso di registracion y demas citanan, e proceso lo continua y e persona en cuestion lo ricibi un contesta mas liher posibel. Den algun caso e ta necesario pa haci citanan adicional prome cu tuma un decision y e posibilidad di entrega un obhecion y entama di e manera aki un proceso legal si e ta desea esaki. Tene na cuenta cu e medidanan di Covid ta keda aplicable durante di e bishita na DIMAS, pues tapaboca ta keda obligatorio.