Loke mester a bira gran proyecto di Gabinete Wever Croes ta keto bay para y mustrando riba un hotel fantasma cu no tin fecha pa continua

Gabinete Wever Croes den tempo ainda cu Otmar Oduber tabata forma parti di e gabinete aki, a presenta su prome y único gran proyecto cu mester a wordo realisa na San Nicolas na Seroe Colorado, di e compania Three Rivers, cu mester a desaroya Secret Passion, ta para keto bay un fantasma sin indicacion algun ki dia of si e lo bira realidad ainda.

E tereno ta sera y unico cos cu por mira riba e tereno pa varios luna caba, ta algun bulto di santo blanco, dunando impresion cu trabounan ta andando pero ta biento fuerte so ta sutanto e bulto di santonan aki dia’den, dia’fo.

No tin movecion y loke ta hala atencion ta cu na final di 2020, Gabinete Wever Croes a haci mencion cu e proyecto aki lo start na luna di mei di 2021 cual tabata luna pasa, pero no tin indicacion algun di trabounan cu ta tumando lugar.

Tabata un proyecto cu sigur e partidonan formando e coalicion di MEP-POR-RED, lo kier a usa den nan campaña pa eleccion 2021 cu mester a tuma lugar na luna di septemer di e aña aki, pero cu a wordo hala dilanti pa 25 di juni.

E proyecto ta para, e Minister y poliico cu a bin cu e proyecto aki, ya no ta den gobernacion y tampoco den politica mas cu ta Otmar Oduber y e invertidumbre cu tin riba e proyecto aki, ta sigui crece.

Ultimo tempo a wordo publica documentonan caminda e tereno aki na Seroe Colorado, lo ta bou ‘beheer’ di Arulex, cu ta un compania maneha pa e oficina dia abogado di tata di Prome Minsiter Evelyn Wever Croes.

Ta un proyecto cu ta masha cotnradictorio ya cu entre otro e tempo ey Minister Otmar Oduber, lo a fina como exigencia pa su partido POR participa den e Gobierno di coalicion, cu e proyecto hotelero aki mester sigui y cu mester termina e contract relaciona cu reapertura di e refineria na San Nicolas, ya cu e dos proyectonan aki no ta bay hunto den mesun region.

No ta conoci si empresarionan di e hotel lo a pone esaki tambe como condicion, pero mientrastanto Gabinete Wever Croes a dicidi di caba cu e contract cu Gobierno tabatin cu CITGO, anunciando cu e refineria lo no habri mas pero den campaña electoral ta otro gai ta canta.

Recientemente a sali publicacion di declaracionnan di e actual Miniter di Labor demisonario y candidato riba lista di MEP, Glenbert Croes pero tambe di otro candidatonan, cu reapertura di e refineria lo sigui dentro di poco sin menciona manea custumber, nomber di un of otro compania.

Pa añanan largo e lider di MEP, Evelyn Wever Croes a papia di un lista di compania cu kier habri e refineria, pero cualnan no kier a papia cu e tempo ey Gobierno di Mike Eman, pero for di e dia ey, nunca a presenta un solo nomber di un compania interesa pa habri e refineria.

Awor si declaracion di Glenbert Croes ta corecto y otro candidatonan riba e listra di MEP ta papia mesun cos, e ta dunando e impresion cu e proyecto hotelero lo no ta factibel mas e ora ya cu aparentemente esey tabata un di e condicionnan p’e hotel aki wordo construi.

E falta di actividad riba tereno di e hotel, e deteriorio di e poco materialnan cu tin riba e tereno, ta mustra cu pa algun tempo caba no tin actividad di construccion n’e sitio y awor ta lanta e pregunta, si a para construccion di e hotel na momento cu e propio partido MEP ta papia di reapertura di e refineria, anto di otro banda no tin actividad den e proyecto hotelero.

Pues por conclui cu partido MEP practicamente a para of elimina hasta dos proyecto cu lo por a crea hopi cupo di trabou p’e bario di San Nicolas y e unico cos cu por mira pariba aya na Seroe Colorado, ta un hotel fantasma un algun cero di santo blanco.