Aduana a felicita colega Sr. Roque Maduro cu su 42 aña den servicio di Departamento di Aduana

Recientemente sr. Roque Maduro a cumpli 42 aña den servicio na Departamento di Aduana. Diaranson dia 2 di juni ultimo su estimado coleganan a organiza un marcha na seccion di Barcadera como sorpresa pa despedi di sr. Roque. Sigur un momento bunita y alabes emocional como recuerdo pa tur loke sr. Roque Maduro a haci di curason pa su dienst.

Alabes diahuebs dia 3 di juni den un rato ameno na Bureau di Minister di Finansa, Asunto Economico y Cultura, y den presencia di Director di Aduana y Chef suplente di sr. Roque Maduro, Minister Xiomara a felicita sr. Maduro p’e sosten y tempo brinda pa labora pa su pais.

Señor Roque Maduro a cuminsa na Departamento di Aduana dia 16 di juli 1979. Durante su añanan di servicio Roque a crece y eherce diferente funcion. Roque a haya un promocion p’e rango di Kommies der Belastingen 2de Klasse na aña 1985.

Na aña 1993 Roque a drenta den e rango Kommies der Invoerrechten en Accijnzen 1ste Klasse y na aña 1998 Roque a ser promovi p’e rango Kommies der Invoerrechten en Accijnzen 1ste Klasse A.

Tambe ta importante pa menciona cu señor Roque Maduro tabata encarga cu e training di e peloton di Douane y alabes a fungi como e Commandant di e Peloton pa Departamento di Aduana por luci na tur plechtigheid. Ademas, Roque tambe a yega di maneha e softball team di Douane.

Señor Roque Maduro a sirbi e organisacion cu alma, cuerpo, curason y tin un experticio amplio riba diferente area.

Durante 42 aña Roque Maduro a desplega un carera ehemplar y a sa di aporta positivamente na nos departamento. Coleganan sigur lo haya su falta.

Gerencia y Staf di Departamento di Aduana ta felicita colega sr. Roque Maduro y ta dese’e tur cos bon den su etapa nobo como pensionado.