Candela intencional den cas caminda dama a wordo asesina ta confirma mentalidad peligroso

Diaranson anochi banda di 10’or, a surgi un candela den un cas den Flamboyantstraat caminda a bin resulta cu ta mesun cas den cual a bin haya un damita di 20 aña, S. Petronia asesina c’un tiro den cabes.

Den e caso aki tin dos detencion a cay di dos mucha homber di 17 aña, pues ambos menor di edad.

Segun por a compronde e incendio den e cas na San Nicolas a resulta di ta algo intencionalmente haci cual hecho si t’asina, ta lanta mas pregunta kico realmente ta pasando den mente di algun, hende, kisas den mente hasta di algun hoben.

Ya caba dos detencion a cay y tur cos ta mustra cu Polisnan tin e caso di asesinato di e mucha muher soluciona, pero e hecho cu awor algun anti-social ta dicidi di sende e cas na candela, ta bolbe mustra un tipo di mentalidad cu no ta bon y cu ta hopi malo.

Por sospecha cu ta amigonan di e dos hobennan deteni lo a comete e acto aki, pero no ta sigur pero simplemente no tin hustificacion p’e candela intencional aki cometi riba e cas menciona.

Kisas lo por a haci esaki pa elimina cualkier otro tipo di prueba cu autoridadnan lo por a haya den e cas of e lo por ta algo pa vengansa pa morto di un ser keri, pero tampoco esaki por conclui ya cu autoridadnan mes no tin nocion ainda di e motibo di e incendio aki.

Sinembargo e tipo di incidentenan aki, tanto e asesinato como e incendio, ta mustra un tipo di mentalidad cu ta hopi peligroso y cu  lamentablemente a lanta cabes hopi den ultimo añanan.

Hobennan cu ta mas agresivo, hobennan practicamente menornan di edad cu ta cana arma rond, grupo di hobennan cu ta busca otro pa likida of pa maltrata, pues un desaroyo cu ta nada positivo y cu a birando algo hopi serio.

Con tin cu atende cu e asunto aki ainda autoridadnan no tin solucion, pero e ta un problema cu e proximo Gobierno tin cu fiha un maneho estricto hunto cu autoridadnan hudicial pa wak con ta frena e peliger aki y frena tambe cu hobennan ta perde nan bida na un edad asina jong, pa colmo algun di nan lagando yiunan chikito atras y nan famia den tristesa grandi.