Crimen contra di criaturanan inocente a aumenta den tempo di pandemia

Dos dia pasa comunidad a wordo sacudi ora cu noticia a drenta di tres criatura menor di edad, a wordo libera for di un cuarto di palo cu tabata claba sera na Santa Cruz, kendenan tabata den un situacion hopi delicado.

Ta tres mucha bou di shete aña cu pa un motibo ainda no conocí, a ser neglisha y mal cuida pa esnan responsable pa nan bienestar, cu ta dos adulto, di cual uno ta nan mama y e otro compañero di bida di e mama.

No ta prome caso di negligencia serio di criaturanan inocente ya cu poco tempo atras, un otro criatura a perde su bida den stacionamento di hospital, ora cu su tata a baha na trabou, lubidando por completo cu e mester a hiba su yiu un creche cu consecuencia cu e mucha a perde su bida.

Di e caso aki no a scucha nada mas di autoridadnan hudicial, pero tin otro casonan di negligencia den ultimo aña aki, cu ta duna un indicacion cu negligencia di muchanan a aumenta seriamente.

Tin casonan cu no ta yega na oido di autoridadnan concerni, pero no solamente negligencia pero tambe maltrato di criaturanan, cu ta mustra riba un tendencia cu a recuri durante di e pandemia di Covid-19 y cu a bira un trend rond mundo.

Na varios pais muchanan chikito, tin ora babynan recien naci of di algun luna, ta wordo asesina den forma cruel, hopi di nan victima di un situacion di stress ocasiona p’e presion di e pandemia, di hendenan sin trabou, mayornan cu no tin placa pa sobrebibi y caminda na madre patria Hulanda, e tendencia aki tambe a aumenta.

Por ehempel n’e aldea di Wernhoutsburg dia 12 di mei a bin haya un baby den un saco di sushi, cu tabatin algun dia morto y ayera resultado di autopsia a bin saca afo cu e criatura chikito y inocente aki, a muri dor di maltrato, pero ainda autoridadnan no por saca afo kende e mayornan ta.

Den otro caso algun siman pasa, un mama a mata su yiu muher di 7 aña y despues a comete suicidio dor di problemanan amoroso cu tata di mucha, kende a bandona nan dos ora cu el a perde trabou y a dicidi di bay busca un otro bida.

Ayera mainta na Spaña pa mas exacto den e ciudad di Tenerife, e comunidad a wordo sacudi ora cu autoridadnan a bin haya un mucha muhet di 6 aña, den un tas grandi riba fondo di laman y cual tas tabata mara na un anker.

Ainda autoridadnan ta buscando ruman di e mucha muhet aki, un criatura cu nomber di Anna di dos aña kendenan a wordo secuestra y hiba pa nan tata Tomas Gimeno dia 27 di april na mesun ciudad di Tenerife.

Pa motibo cu mama di e criaturanan a caba cu e relacion, e tata a bay cu e muchanan y a manda bisa e mama cu e lo no mira e muchanan nunca mas y autoridadnan a bin haya un boto di e homber den becindario caminda a haya e curpa di e yiu grandi y ta teme cu e otro yiu tambe lo ta morto y e posibilidad ta grandi cu e tata tambe lo a comete suicidio.

Asina por sigui menciona cantidad di casonan serio, abusonan cu ta wordo cometi contra di criaturanan inocente, hopi den ultimo tempo a bira victima di e presion sicologico cu pandemia a bin ta ocasionando riba mayornan di  muchanan.

Aki na Aruba e situacion no ta diferente ya cu tin diferente caminda hasta autoridadnan policial sin cu nan ta na altura di e situacion, tabata complice di situacionnan cu tabata peligroso pa muchanan menor di edad.

Tin pareha cu a wordo deteni durante di pandemia kendenan a laga dos yiu menor di edad drumi na cas  y ora cu no a avisa autoridadnan, e muchanan a pasa e anochi si nan mayornan den cas pa cuida y proteha nan y ta ora cu di dia a habri, nan a regresa cas pa bin haya e muchanan tog sin cu nan a enfrenta cualkier situacion dificil. Muchanan ta rekeri ayudo di henter un comunidad, principal mayor y famianan cerca, pero tambe di institucionnan social y hudicial p’asina evita cu por haya casonan serio y hasta fatal cu bidanan di e criaturanan inocente aki.