Fundacion Centro di Pesca Hadicurari cu otro inversion mas pa nos piscadonan

Colorido, asina e ranchonan di piscador na Colony ta kedando awor cu nan a haña un capa di verf nobo. Despues di hopi tempo esakinan ta wordo pinta atrobe. Esaki ta danki n’e aporte di Fundacion Centro di Pesca Hadicurari, cu ta cooperando cu Santa Rosa, a provee materialnan necesario pa personal di e sección di pesca mantene e area y facilidadnan di e piscadonan.

Esaki riba petición di Minister Chris Romero, kende tambe a pidi Fundacion Centro di Pesca Hadicurari cooperacion pa denter di poco drecha e staca cu ta sirbi e piscadonan como guia pa drenta den e bahia.

Directiva di Fundacion Centro di Pesca Hadicurari, bou guia di Presidente Arthur Giel, ta contento di por aporta un biaha mas na yuda piscadornan y centronan di pesca rond Aruba.

Den pasado e fundacion a aporta na completamente renoba piernan na Oranjestad (Rancho), Spaans Lagoen, Barcadera y Colony. Ademas na Spaans Lagoen a remplasa varios rancho y converti esakinan den un centro moderno y organisa cu mas facilidad.

Den futuro cercano por spera mas cooperacion cu Santa Rosa pa mehoracion di centronan rond Aruba y asina sigui cumpli cu su meta di yuda piscadornan di Aruba.