Johnny Croes Full-Time cu LeerOrkerst danki na Alberto Peret-Gentil di Grupo Pering

Skirbi pa Clyde Harms

Johnny Croes sigur no a imagin’e dia cu el a tuma e iniciativa di trece LeerOrkest na Aruba cu su bida lo cambia asina tanto. Desde cu LeerOrkest (Aruba) a cuminsa su actividadnan, Johnny Croes, docente di piano na Scol di Musica “Rufo Wever”, ta dedica casi tur su tempo liber na e desaroyo di nos musiconan di futuro. Johnny ta produci video “anima” estilo Walt Disney pa duna les di musica. Cu e videonan, mas mucha por haya les cu menos docente. Pero LeerOrkest a haya un acogida inesperadamente grandi y Johnny no tin suficiente tempo liber pa mantene paso cu e demanda di mas scol pa mas mucha haya les.

Alberto Peret-Gentil di e Grupo Pering di Venezuela, cu un gesto di amor pa Aruba y un admiracion pa e trabou magnifico cu LeerOrkest ta haciendo, lo trece un cambio enorme. Cuminsando e proximo aña escolar 2021-2022, Johnny lo tuma un sabatical di un aña for di Scol di Musica pa dedica tur su tempo na LeerOrkest y Grupo Pering lo financia e sabatical completamente. Esaki ta un contribucion di mas di Fls. 100,000.00.

Grupo Pering tambe a ofrece di restaura completamente e edificio Sociedad Bolivariana pa esaki bira cas di LeerOrkest, pero apesar cu Sr. Lampe, Ministro di Educacion, a duna su respaldo incondicional  na LeerOrkest pa e por a lanta su halanan, te awor Gobierno no a duna su aprobacion.

Durante tur cinco Aruba Symphony Festival, e rumannan Perret-Gentil a haci contribucion monetario y di apartamento gratis pa hopi maestro y artista invita cu nan famia.

Grupo Pering a crea empleo pa centenares di Arubiano durante construccion di su propiedadnan y otro centenares pa opera y mantene nan. Harbour House cu e siman aki a habri oficialmente na Weststraat lo trece restauracion di un parti di Oranjestad hopi importante pa turismo crucero y lo stimula mas actividad den center di stad.

Pa haci propaganda pa Aruba como destinacion turistico, e rumannan Perret-Gentil a laga imprimi y a reparti gratuitamente “Aruba – Point to Point,” un buki di e fotografo Venezolano renombra internacionalmente Federico Cabello. Tambe e Grupo Pering a financia tur gasto di publicacion di un buki pa recauda fondo pa Koningin Wilhelmina Fonds

Cu otro inversionistanan Venezolano na Aruba, e rumannan Perret-Gentil a forma e grupo PANA (Pa Amor di Nos Aruba). E palabra ‘pana’ ta wordo uza pa indica “amigo” na Venezuela. PANA a mustra hopi amistad di Venezolanonan pa nos comunidad. PANA a patrosina e programa Sinterklaas Riba Caya (reparticion di regalo pa muchanan di famia pober) y nan a regala materialnan di scol na Cayena Kleuterschool y e scol di San Nicolas. Aña pasa PANA a contribui generosamente na e Heroes Program pa sostene esnan na frente di e lucha contra e pandemia Covid-19.

Danki, Alberto y Irwin Perret-Gentil. Danki LeerOrkest (Aruba). Danki Johnny Croes.