Sistema di control y test ta funciona. T’asina a descubri 2 pasahero cu Covid riba crucero

E crucero cu a sali diahuebs di Aruba pa Corsou y ayera pa Sint Maarten, a raporta diahuebs atardi cu dos pasahero a test positivo pa Covid-19. Esaki mientras cu tur pasahero riba 18 aña ta completamente vacuna y a haci un test por lo menos 72 ora prome cu sali for di Sint Maarten pa regresa Merca..

“Cu esaki Celebrity Cruise lines a demostra di tin un bon sistema di control y di test, cu ta detecta pasaheronan mesora”, asina Marc Figaroa, Director di Aruba Ports Authority NV a splica.

Celebrity Millennium t’e prome crucero pa cuminsa opera den Caribe. Mundo henter tin wowo riba e proceso adapta y cu protocolnan di salud nobo den e industria aki. E estado di Florida na Merca, for di unda mayoria crucero ta sali pa islanan Caribense mes ta sceptico ainda y tin casonan den Corte andando pa convence Gobierno Mericano cu e sistemanan di control ta funciona. Cu e caso di diahuebs, ta subraya un biaha mas cu e industria tin protocolnan bon hinca den otro pa cuida su tripulacion, su pasaheronan y e destinacion.

E compania di crucero a sigura cu ambos pasahero ta kedando hunto den kamber y cu nan ningun tin sintoma. Asina mes a isolanan riba e crucero te ora cu yega Sint Maarten ayera, unda lo baha y e biahe a termina.

“No tin motibo pa panico, pasobra Covid-19 a bin pa keda. Nos djis mester percura pa nos sistema di test, detecta y isola mesora ta funciona y esey a keda demostra. Tanto na Aruba, hunto cu DVG, a re-enforsa tur e medidanan aki, como tambe riba e crucero mes unda tin un lista di medidanan pa cuido di salud”, asina Marc Figaroa a sigura.

Manera por ripara, ta exigi un Covid test prome cu termina e biahe y t’ey a descubri e dos pasaheronan cu, aunke ta contagia, no tin sintoma y ta sinti nan mes bon.

“E prome crucero aki a sirbi tambe p’e coleganan na Aruba Ports Authority hunto cu DVG por a repasa tur e medidanan existente y garantisa cu pasaheronan y tripulacion no tin Covid ora yega nos isla. Y asina nos lo sigui tambe den e simannan cu ta bin, ora yama bon-bini na mas crucero den nos waf”, segun Marc Figaroa. Celebrity Millennium a sali for di Sint Maarten diasabra ultimo, a pasa Barbados, Aruba, Corsou y ta regresa Sint Maarten bek. E mesun crucero aki lo bishita Aruba algun bes mas e aña aki ainda.