Tur esnan concerni ta preocupa tocante e caso di e 3 muchanan

Recientemente Directie Voogdijraad; Korps Politie Aruba; Bureau Slachtofferhulp; Departamento di Asunto Social y Bureau Sostenemi por a observa den medionan di comunicacion, cu a surgi un preocupacion grandi relaciona cu un caso di 3 mucha cu actualmente ta biba cu nan mama y su pareha nobo.

Den e ultimo dos dianan e famia aki a wordo bishita dor di Polis y Directie Voogdijraad. E caso aki actualmente ta bou di investigacion cerca Bureau Sostenemi p’asina por determina e situacion cu e muchanan aki ta bibando aden. Instancianan tin hopi contacto cu tur miembronan di famia, incluyendo e wela di e muchanan y e scol caminda nan ta bay.

E caso aki ta uno complica y ainda tin hopi pregunta cu sigur mester haya su debido atencion y wordo contesta, pa por haya un bista concreto relaciona cu e situacion di e muchanan aki pa por brinda nan un mihor futuro. Pa por haya contesta riba tur e preguntanan aki mester haci un investigacion profundo primordialmente y esaki ta locual cu ta tumando lugar.

Ayera a tuma lugar un reunion conhuntamente cu Polis, Bureau Slachtofferhulp, Departamento di Asunto Social y Bureau Sostenemi. Durante e reunion aki tur instancia a wordo bon informa di e caso y a haci palabracionnan concerni e siguiente pasonan cu mester wordo tuma lugar pa cu e investigacion aki.

E preocupacion cu a surgi den e ultimo dianan por causa mas daño n’e famia y muy en especialmente e muchanan, dor di e atencion negativo cu e ta ricibiendo. E mas primordial p’e caso aki por cana su caminda debido ta pa instancianan cumpli cu e palabracionnan cu a wordo haci.

Nan di Bureau Sostenemi ta compronde e preocupacion aki pa cu e muchanan. P’e motibo aki nan ta informa cu nan lo ta acercando tur persona concerni cu ta preocupa y cu a bin pa dilanti cu informacion di caso aki den forma publico, p’asina informanan debidamente y corectamente di ful e investigacion.

Tur e profesionalnan envolvi den e caso aki ta trahando incansabelmente pa percura cu e muchanan aki ta sigur y ta haciendo tur lo posibel pe caso aki wordo resolvi debidamente. Nos ta pidi comprension di parti di pueblo p’asina e caso aki por cana su caminda.

Na prome lugar t’e seguridad di e muchanan aki, y p’esaki ta trahando riba un plan di seguridad (veilighedsplan) p’e caso.