AVB a brinda oportunidad unico na coachnan

E cursonan special cu AVB ta brindando na entrenadornan, den cooperacion estrecho cu CONCACAF di Caribe y KNVB di Hulanda ta dunando masha bon resultado. E entrenadornan mes ta expresa nan satisfaccion pa por haya e oportunidad aki, di por sigui desaroya, di por aporta na crecemento y mehoracion di e nivel di futbol riba nos isla. Claro cu esaki lo no ta posibel sin e empeño y trabou duro di e directiva di Arubaanse Voetbal Bond (AVB), specialmente di su Presidente cu tin masha bon contacto cu tur e federacionnan internacional aki.

Awor cu ta brindando oportunidad pa coachnan por haya licencia oficial di entrenado, por sinti un entusiasmo grandi den e ekiponan y e organisacionnan di futbol riba nos isla. Por ehempel awor mas hende ta compronde cu tin un diferencia entre e licencianan pa coach di futbol, manera nos conoce e categoria B y C. E licencia C ta mas pa mucha desde U9 pa U17, ya cu nan ta den desaroyo. Ey lo educa e entrenado con prepara e muchanan.

Coach di SV Dakota, Jonathan Lake, a splica cu cada edad tin un etapa cu mester tene cuenta cu ne. Pa loke ta trata e licencia di B, esey t’esun mas pa hungadornan senior, esta U17 bay ariba. El a gradici Arubaanse Voetbal Bond (AVB) p’e oportunidad, pasobra nan a caba di sali di C-Licence. Esaki tabata masha bon mes y como e tin hopi aña di experencia, Lake a haya oportunidad pa pasa e otronan.

E ta contento di e oportunidadnan aki, pasobra hopi pais no ta haya chens di pasa tipo di curso aki. Lake a pasa e curso di C, pa cual motibo e ta masha contento. Asina cu e entrenador tin e certificado aki, mesora por ta sigur cu e ta na un cierto nivel. El a haya chens di biaha pa sigui desaroya, debi cu el a destaca den e parti di C. Ta trata di mas of menos 6 di nan cu a haya e oportunidad aki pa sigui avansa pa B y esey ta algo grandi.

Dor di su experencia y oportunidad grandi, e ta gara esaki cu dos man, pa por sigui mehora e muchanan. “Nos tin bon coachnan, pero atrobe no ta tur por pasa nan conocimiento y experiencia na e muchanan. Esey t’e intencion, cu nos por pas’e n’e muchanan bek”, el a indica. Esaki ta importante y Lake ta dispuesto pa traha p’e, pero tambe pa logra esey.