Banco di Caribe, ENNIA & Kiwanis Club of Aruba ta participa den e “Global Money Week Aruba”

Banco di Caribe, Ennia y Kiwanis Club of Aruba ta uni un biaha mas p’e proyecto di “Global Money Week Aruba” organisa pa Banco Central di Aruba. “Global Money Week Aruba (GMWA)” ta forma parti di e plataforma internacional di “Global Money Week”, un evento educacional cu ta tuma lugar mundialmente cada aña y cu ta enfoca riba educacion y conscientisacion den e area financiero.

Meta ta pa educa nos futuro generacion den un manera interactivo di e diferente areanan di placa: Con pa traha placa, con pa spaar placa, con pa uza placa na un manera responsabel y con pa duna bek na comunidad.

E aňa aki, e scolnan cu ta participa ta Colegio Sagrado Corason y Reina Beatrix Basisschool. E studiantenan di 5e y 6e klas a ricibi un presentacion di 3 diferente tema.

E temanan ta:

  1. Gasta y Spaar;
  2. Gana Placa;
  3. Comparti.

A base di e presentacion, e studiantenan por haci un escogencia pa cu e tema di nan preferencia.

E tema Comparti” ta wordo patrocina pa Banco di Caribe, Ennia y Kiwanis Club of Aruba y tin como meta pa inspira nos studiantenan y demonstra nan e importancia di duna bek na nos comunidad y e diferente maneranan con pa haci esaki.

Den e presentacion, e studiantenan por a observa dos video di dos diferente fundacion na Aruba, cual ta Cruz Cora Aruba y Fundacion Pa Nos Comunidad (FPNC), p’asina nan por haya mas informacion di e dos fundacionnan aki cu ta haci hopi pa e comunidad di Aruba. 

E studiantenan tin como tarea pa traha den grupo y asina “brainstorm” diferente ideanan con pa colecta mas fondo y trece mas conscientisacion pa un di e dos fundacionnan. E grupo cu bin cu por presenta e mihor idea lo ta e ganador di e tema “Comparti”.

Pa mas informacion tocante e actividadnan di Global Money Week por bishita e Facebook page y Instagram di Global Money Week Aruba. Banco di Caribe, Ennia y Kiwanis Club of Aruba ta desea e muchanan hopi exito!