Campaña di Dangui Oduber ta mustra di lo supera lider di MEP como ‘vote getter’

Campaña electoral ta alcansando su cumbre faltando 14 dia pa pueblo vota, partidonan ta aumentando nan actividad y bishitanan cerca votadornan, p’asina gana nan sosten den e proceso electoral di dia 25 di juni benidero.

AWEMainta a yega di publica caba cu den e partido geel di MEP, no solamente tabatin un lucha formal tumando lugar p’e prome 8 puestonan riba lista di e partido, pero tambe tin un tipo di lucha silencioso tumando lugar pa liderasgo di e partido.

Dangui Oduber candidato number 3 riba e lista, ta kisas e unico Minister di Gabinete Wever Croes cu no a sufri daño na su popularidad den un Gobierno cu a fracasa formalmente cu pueblo, sin cumpli cu loke a wordo priminti na 2017, loke por conduci tambe na cambio den liderasgo di e partido despues di eleccion.

Cu ayudo di e experencia di su tata, e ex lider di MEP, Nelson Oduber, Dangui a drenta su di tres campaña electoral y ta impresionando cu su agresividad y presencia tur caminda pa medio di propaganda, sticker y borchinan.

No ta tur candidato di partido MEP ta mustrando nan poder politico, kisas pa falta di fondo, pero Dangui a bin ta sobresali den campaña di su partido, anto di tal indole cu hasta tin e anticipacion cu su persona lo supera lider di MEP, Evelyn Wever Croes como e vote getter di e partido den e proximo eleccion.

Evelyn mes no t’asina activo den promocionnan caminda tanto Dangui como Xiomara Maduro, t’esnan cu mas a bin ta resalta den e proceso aki, pero e indicacion ta mustra cu den propio seno di e partido, tin hendenan di e lider mes lo a pasa pa bay sostene Dangui den su campaña electoral.

E lider di MEP den eleccion di 2017 a ricibi un total di 3503 voto personal, mientras cu Dangui a logra di haya 2399 voto personal cu ta un diferencia di 1104 voto y cual sin duda lo por wordo supera cu e yiu di Nel superando e barera di 3500 voto den eleccion di 25 di juni.

Analisando e desaroyonan di e campaña geel, ta mustra cu hasta tin e posibilidad cu Xiomara Maduro, kende ta number dos riba lista di MEP, tambe por supera Evelyn den popularidad mirando cu den eleccion di 2017, Xiomara a logra un total di 2696 cu ta solamente 807 voto menos cu su lider, cual cantidad e lo por supera sin duda.

Xiomara ta hibando un campaña mescos cu Dangui cu hopi visibilidad y den varios bario, mientras cu un otro lucha cu ta tumando lugar den seno di e partido, ta entre e dos candidatonan  cu ta aspirando pa bira Minister di Husticia cu ta Rocco Tjon candidato number cinco y Alvin Molina candidato number 10 riba lista.

Nan mensahe na nan votadornan ta mas tanto riba asuntonan hudicial, criminalidad pues ambos aspirando pa logra e cartera di husticia den e Gobierno nobo, dependiendo kico e partido haci den eleccion.