Mitsubishi Nativa a bolter na Sabanilla Abao y chauffeur a keda pega den auto

Diasabra anochi laat informacion a drenta cu un auto lo a bolter na Sabanilla Abou y cu e persona ta herida. Mirando e seriedad di e accidente a pidi pa Materiaalwagen. N’e sitio a presenta dos unidad di Brandweer incluyendo e Materiaalwagen. 

N’e sitio e unidadnan di rescate a bin topa cu auto benta den mondi banda di panort riba e caminda di Sabanilla Abou. Tabata trata di un Mitsubishi Nativa color blanco.

E chauffeur masculino tabata den un posicion cu su pia tabata pasa dor di e stuurwiel y colgando pafo di e windshield. 

Por a mira cu bomberonan tabata comunica cu e homber.

Bomberonan mester a stabilisa e vehiculo debi cu e esaki tabata riba su banda robes. A logra saca e chauffeur despues cu a corta parti di dak.

Paramediconan n’e sitio tabata stand by pa mesora tuma e persona over y pasa den ambulance.  Polisnan di Trafico a presenta n’e sitio pa tuma dato di locual a pasa. Velocidad halto ta mustra di por a hunga un rol. E victima a wordo transporta pa Hospital.