Pa robo di kabritu na Boneiru… Kaso a bai para te den Korte Supremo Hulandes

WILLEMSTAD – Ken lo a pensa un kaso penal pa robo di kabritu na Boneiru lo a yega te dilanti di e Alto Tribunal Supremo di Reino i praktikamente ta algu historiko ku un kaso ku por parse banal asina  a yega asina leu den historia hudisial di Reino.

Sinembargo, loke a duna e kaso mas importansia t’e hecho ku den e intento di robo – ku na final a frakasá – un kabritu a muri i esei a lanta un diskushon asina profundo ku e ladron di kabritu a bai pidi un veredikto di Korte Supremo.

Laga nos kuminsa pa konstatá ku no solamente na Kòrsou, pero akaso na Boneiru kabritu ta un ‘heilig beestje’ ku basta e ta bon prepará ta bira un plato krioyo super sabroso. Pe motibu ei, robo di kabritu na Boneiru ta al orden del dia i tin tantu kunukeru komo outoridatnan mal fadá. E t’asina molestoso ku un par di aña pasá Hues a kondená un ladron di kabritu na un aña di kastigu di prizon inkondishonal pa ilustrá gravedat dje delito.

Den e kaso ku Korte Supremo a atendé i dikta veredikto ayera na Hulanda, ta trata di un ladron di kabritu, kende ku su kasá a bai pone trampa den kunuku na Boneiru, pero hende ku a pasa mira ki ta pasa a yama Polis, i nan a pone un paro n’e robo.

Korte a trata e kaso den promé instansia, den apelashon i finalmente el a resultá den skochi di Korte Supremo ku a konfirmá e kondena dje ladron di kabritu i a dikta un kastigu di mil dòlar di sancion of 20 dia será.

Metikuloso manera Hulandesnan ta, mitar dje veredikto di mas ku 20 pagina a bai pa splika ku te diferensia entre hòrta kabritu for di un kunuku of for di ‘weide’, pasobra na Hulanda ta riba ‘weide’ nan ta kria baka i karné i kabritu i den tempunan di antaño Kódigo Penal tabata papi di ‘weide’ na Boneiru.

Durante e intento di robo di kabritu, e ladron ku asistensia di su kasá a kibrá tranké dje kunuku i unabes ku e kabritunan tabata ‘changá’, un di nan a muri di asfikshon. Polis ku a yega n’e sitio a yega haña 23 kabritu ku pata mará na suela klá pa ser transportá den pickup.

Promé ku por a pasa pa tratamentu dje aspektonan huridiko dje kaso, mester a resolvé ku si ta for di un ‘weide’ of un ‘kunuku’ e homber a hòrta kabritu. Pasobra si no tin ‘weide’ na Boneiru, e no por a hòrta for di un ‘weide’ i e kargo lo a kai. Despues di a listra den masha buki bieu a disidi pa kalifiká un ‘weide’ komo kunuku.

E robo a tuma lugar dia 15 di januari 2017 ora e ladron a bai ku ayudante i hèrmènt pa kòrta tranké dje kunuku pa hòrta e kabritunan.

Ora polis a yega e sitio, tabatin tres persona ne lugar, pero nan a kore bai den mondi i komo ku na Boneiru praktikamente tur hende konosé ken ta ken, Polis a rekonosé esun ku a kore bai. E Polisnan a buska otro doño di kunuku pe bin kontrolá cu si tin kabritu di dje den e manada di 24 kabritu, pero nan tabata di su ruman.

E ruman a rekonosé e kabritunan mesora na nan koló, pasobra t’asina ta rekonosé kabritu na Boneiru. Ta bon pa anotá ku robo di kabritu ta algu serio na Boneiru riba kual tin seis aña di kastigu. Korte Supremo a rechasá pa trata e kaso, pasobra e deskripshon huridiko tabata mankaron i e kaso no a kalifiká pa tratamentu. Nan a retorná Kòrsou pa Korte di Hustisia lokal tuma desishon.