Caida den demanda pa credito na banconan comercial na maart 2021

Durante e reunion di 18 di mei 2021 y despues di a revisa dato economico y monetario mas recien, e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento. 

E tasa di e reserva rekeri t’e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 aña. A considera e siguiente informacion y analisis pa yega n’e decision aki.

RESERVANAN INTERNACIONAL

E reservanan internacional (incluyendo e diferencia di revaluacion di oro y reserva di divisa) a aumenta cu Afl. 223,7 miyon te na un nivel di Afl. 2.580,3 miyon, te cu y incluyendo 30 di april 2021, compara cu fin di december 2020.

E aumento aki ta debi principalmente na sosten di likides di Gobierno Hulandes pa Gobierno di Aruba y entradanan mas halto relata na turismo.

Reservanan oficial di divisa a nota un subida di Afl. 109,8 miyon. Consecuentemente, e reservanan oficial y e reservanan internacional a yega te na, respectivamente, Afl. 2.317,7 miyon y Afl. 2.580,3 miyon riba 30 di april 2021.

Di e manera aki e reservanan a keda na un nivel adecua ora di compara nan cu e nivel critico di 3 luna di pago registra riba cuenta coriente y e metrico di ARA di IMF.

DESAROYONAN DEN CREDITO

Den maart 2021, credito total a baha cu Afl. 28.5 miyon/0,7 porciento te na Afl. 3.935,6 miyon, compara cu fin di 2020. Esaki ta debi n’e componentenan ‘fiansa na individuo’ (-Afl. 21,1 miyon/-1,1 porciento), ‘fiansa na empresa’ (-Afl. 3,9 miyon/-0,3 porciento), y ‘otro’ (-Afl. 3,6 miyon/-0,7 porciento).

E categoria ‘fiansa na individuo’ a cay pa motibo di un demanda mas abou pa credito na consumidor. Mientrastanto, e componente ‘fiansa na empresa’ a mengua a causa di hipoteca comercial.

INFLACION

E Indice di Prijs di Consumo (CPI), tabata 1,1 porciento mas abou na maart 2021 compara cu e mesun luna di e aña anterior. Esaki tabata primordialmente causa pa prijsnan mas abou den e categorianan ‘recreacion y cultura’ y ‘paña y sapato’. E promedio di inflacion di 12 luna a baha te na -2,3 porciento na maart 2021.

E promedio di inflacion di 12 luna, excluyendo e componentenan di energia y cuminda, tabata -0,9 porciento na maart 2021 compara cu 0.1 porciento na december 2020.

LIKIDES PRUDENCIAL

E proporcion di likides prudencial di e banconan comercial (34,8 porciento), cual ta midi e cantidad di activo likido compara cu e activo total netto di e banconan comercial, a keda na un nivel comfortabel den maart 2021, compara cu e likides minimo rekeri di 15,0 porciento.