Disgusto grandi cerca votadornan cu cambio di lugar pa bay vota den otro bario

Realmente mester puntra ta kico ta pasando cu esnan responsable cu e proceso electoral di 2021 ya cu un discrepancia tras di otro ya cu awor cu tur carchi di vota ta reparti, tin cantidad di hende sumamente disgutra y frustra cu cambio di nan lugar di vota.

Principalmente hendenan grandi, hendenan di edad halto a wordo sorprendi con di repente nan tin cu bay vota den un bario cu no ta nan bario, aleha por completo di nan adres normal.

Por ehempel den e bario di Pos Chikito tin cantidad di hende cu a wordo cambia di urna, algun tin cu bay te na Macuarima pa deposita nan voto y otronan a ser manda na un of otro scol na San Nicolas, pues sumamente aleha di nan urna normal pa añanan largo.

Entre e grupo di hende cu a wordo sorprendi tin hopi hende grandi cu no tin auto, cu no tin nan propio forma di transportacion, pero awor ta wordo obliga pa nan tuma un bus pa bay vota, loke nunca antes nan mester a haci.

Hendenan cu ta biba den casnan di pueblo na Pos Chikito, kendenan pa custumber semper a vota na Colegio Santa Famia cerca di retonde di Pos Chikito, a wordo manda pa Caiquetio School na San Nicolas, paribanan aya, sin cu tin un splicacion husto.

Habitantenan di e bario di Paradera, a bin haya nan carchi caminda awor nan tin cu bay vota na Ayo, mientras cu otronan cu ta biba na Santa Cruz, awor tin cu busca un forma  pa yega San Nicolas p’asina nan haci uso di nan derecho pa vota.

E maniobranan aki, ya cu realmente no ta algo cu ta pasa frecuente den ultimo eleccionnan, ta bolbe crea un duda riba henter e proceso electoral di e aña aki ya cu ta sigur cu hopi votador cu no tin transportacion adecuando, lo no bay para banda di caminda pa tuma un bus pa bay un lugar cu nan no ta custumbra di bay p’asina deposita na voto.

Increibel cuanto cosnan negativo ta influenciando e proceso electoral di e aña aki y extra oficial AWEMainta a bin haya informacion cu e splicacion di Censo ta cu ta computer ta regla e asuntonan aki, pero ta di con net awor e cosnan aki ta tumando lugar.

Sin duda cu e situacion aki lo crea problema pa un grupo grandi di hende cu lo bay keda sin vota, ya cu nan no tin transporte adecuado y ta sinti nan mes incomodo pa bay na un otro lugar cu nan no ta custumbra di bay p’asina por haci uso di nan derecho di voto. Ta algo serio y despues di e proceso electoral aki e proximo Gobierno tin cu intermadia, tin cu atende cu henter e asunto di Conseho Electoral, henter e forma di procede di Censo pa mira di con tanto cos asina a bin ta pasando den e eleccion aki y si ta necesario tuma paso necesario pa atende cu cualkier cos negativo cu a tuma lugar.