DTZ tambe a wordo converti den un mashin di campaña politico di MEP

For di momento cu Gobierno demisionario pa medio di Prome Minister Evelyn Wever Croes a anuncia eleccion pa un Gobierno nobo dia 25 di juni, por a mira e tendencia di silencia e rival mas grandi di partido MEP, cu ta partido AVP.

No solamente e intento di silencia, pero tambe otro accionnan cu a duna e impresion cu lo kier manipula cu e posibel resultado di eleccion caminda entre otro e asunto di uso di scanner na tur urna electora, tabata e mihor ehempel di esaki, mientras cu ultimo dianan e decision di no entrega e “kiezersregister” na partidonan politico, ta otro muestra mas di intento di manipulacion.

Otro intentonan di  silencia opositornan di Gobierno tabata e forma con practicamente ta Gobierno ta defini kico ta pasa den noticiero n’e planta televisora nacional caminda practicamente solamente declaracionnan haci pa miembronan di partido MEP, tabata wordo permiti mientras cu otronan tabata hopi limita.

Pa prome bes di hopi tempo den un proceso electoral e rol di control di DTZ a aumenta y caminda practicamente por bisa c’un biaha mas ta purba di silencia politiconan di otro partidonan cu no ta politiconan di partido geel.

Diasabra ultimo un biaha mas DTZ a interveni den  e programacion di Canal 90 ora cu e tradicional programa radial di tur diasabra mainta di partido AVP, a keda cancela ya cu DTZ ta considera esaki como parti di limitacion di minuutnan cu partidonan politico ta wordo permiti pa tin na radionan.

Pa añanan largo AVP tin e programa aki caminda dos candidato ta combersa cu pueblo, pero awor di repente e no ta permisibel mas, mientras cu tin otro radio emisora cu sin duda ta surpasa e cantidad minimo permisibel pa DTZ y aki ningun medida ta wordo tuma y tin politiconan y partido ta supera e limite stipula sin problema algun.

E situacion ta notabel y DTZ su forma di procede ta uno totalmente diferente na loke den pasado nan a yega di haci pa hiba un control riba e propaganda politico.