Fout den prolongacion di detencion Benny Sevinger ta decision cu “voorbedachte rade”

“To be or not to be” ta un famoso dicho di Shakespeare cual dicho den caso di Ministerio Publico ta al caso y mas bibo cu nunca, pero net al reves, ya cu loke ta tuma lugar diabierna ultimo, ta realmente “not to be, to be.”

Pa un motibo of otro,  Ministerio Publico ta sigui insisti pa atacha su propio integridad, hungando un rol politico bisto den e caso cu nan mes a yama Avestruz, cometiendo un fayo barbaro un biaha mas den e proceso contra di e Parlamentario Benny Sevinger.

Ora cu bolter e dicho di Shakespeare den “not to be, to be” ta bon pa mustra cu Ministerio Publico kier pretende (not to be) cu e no ta independiente di politica, pero ta actuando (to be) concretamente politicamente, dunando un impresion fuerte di kier influencia resultado di eleccion 2021 mescos cu a haci den esun di 2017.

Diabierna un hende a comete un fayo garafal na Ministerio Publico, ora cu a manda informacion cu Hues Comisario a dicidi di prolonga detencion di Benny Sevinger cu 60 dia mas, loke ta nifica cu e politico lo por sali liber te despues di eleccion.

Un participacion cu a causa hopi sorpresa ya cu ainda detencion di e  politico, no a caba di cumpli cu e proceso normal y legal cu Ministerio Publico tin pa detencion di un sospechoso ya cu a pasa 8 dia den e di tres prolongacion di 16 dia, pues ainda falta 8 dia mas pa bay.

Kico a pone cu Hues Comisario a dicidi di prolonga un detencion cu el a prolonga caba no ta conoci, pero sin duda loke a sosode diabierna ultimo, tabata un intento di Ministerio Publico pa alivia e presion cu tin riba e institucion aki, dor di  e forma con el a atende cu e caso aki.

Analisando e forma di procede di Ministerio Publico den e caso aki, tabata di spera cu lo no a laga Benny Sevinger bay prome cu dia 25 di juni cu ta dia di eleccion, ya cu e impacto cu e politico lo a causa, lo ta ainda hopi grandi y Sevinger a mustra bon cla den henter e proceso aki, cu e lo no tene su boca keto riba e proceso.

Ta tristo ora cu un institucion cu ta actua contra  esnan cu faya, ta bira faya nan mes sin cu esaki tin consecuencia algun, mustrando un biaha mas cu e poder di esnan cu ta trahando den e institucionnan hudicial, tog por abusa di e poder di esaki.

Bin dilanti y simplemente bisa cu un fout a wordo cometi no ta un splicacion husto y esaki ta habri caminda pa comunidad sigui sinti un duda grandi den integridad di Ministerio Publico, den su forma di procede y den su forma di implemente husticia.

Ta di dos proceso electoral cu Ministerio Publico hunto cu Landsrecherche ta presta nan mes pa bira parti di e lucha politico y mientras cu ta trata di nenga esaki, e actuacion di e institucion aki ta señala algo totalmente otro.

Sigur ora cu Fiscal Mayor mes dirigi un carta na abogado di Benny Sevinger, sigurando cu te cu luna di september 2021, lo no ta avansa cu e investigacion contra su persona pa por formula un of otro acusacion.

Ta dificil pa kere cu di repente na mes momento cu lider di MEP como Prome Minister a dicidi di adelanta e proceso electoral, di repente e caso aki tambe a wordo adelanta, contra di e contesta di Fiscal Mayor n’e abogado.

Loke ta mas tristo den e situacion di Sevinger, loke tambe a pasa den caso di Paul Croes, t’e hecho cu kisas henter e proceso aki ta tumando lugar a base di “sospecho” cu ainda manera Hues Comisario a duna di conoce n’e abogado, cu ta buscando cosnan robes prome cu por yega na presenta acusacionnan contra di Sevinger.

Si esey t’e caso anto Ministerio Publico y henter e sistema hudicial ta abusando di nan poder, caminda nan mes lo ta manipulando cu e sistema riba rand di legalidad p’asina nan por haci loke nan kier y con cu nan kier, loke ta di condena totalmente.

E eror di diabierna a bolbe confirma e rol politico cu Ministerio Publico tin den e campaña electoral pa di dos eleccion sigui.