No lo duna ‘kiezersregister’ pero tin duda si partido MEP si a haya esaki

E participacion di Minister Presidente y lider di MEP Evelyn Wever Croes a duna ayera, esta cu lo no duna partidonan politico copia di e “kiezersregister” ta igual cu e bisa mesora cu e lider di MEP prome cune, esta Nelson Orlando Oduber, a viola e ley di derecho di privacidad di ciudadanonan di Aruba, ora cu a permiti partidonan haya copia di e registro aki.

Sin duda mester felicita e lider di partido MEP, cu desde cu el a anuncia eleccion tempran despues di a baha su Gobierno, a haci cantidad di maniobra pa influencia resultado di eleccion y awor apenas 10 dia prome cu eleccion tuma lugar, e ta logra di kita e kiezersregister for di su oponentenan politico y el a haci e anuncio publico aki c’un smile di satisfaccion.

Sinembargo na mes momento tambe tin un duda grandi si hasta den e decision aki, e lider di MEP ta sincero den e decision cu el a tuma, ya cu hopi tin e impresion cu su partido MEP mes lo tin e registro aki den su poder caba prome cu e decision a cay oficialmente.

Motibo tin na cantidad pa kere cu esaki ta berdad ya cu no ta prome bes cu Evelyn Wever Croes lo no ta sincero cu e pueblo cu el a huramente di sirbi cu tur honor y sinceridad, ya cu pa casi cuater aña tur decision cu el a tuma como gobernante, el a tuma net contrario di loke el a primintio pueblo cu e lo haci.

Hasta den su programa di gobernacion di 2017 e propio lider di MEP a papia cu e lo bay recupera e autonomia financiero di Aruba, lo drecha e situacion financiero di e pais como parti di su promesa, pero a haci net lo contrario.

E autonomia oficial di Aruba su finansa, tin su firma bou di e acuerdo cu Hulanda, mientras cu su promesa di atende y soluciona e situacion financiero di e pais sin cu e lo tuma medida, ta bay den histora cu Evelyn t’e Prome Minister di e pais aki, cu a suta su pueblo cu mas medida y sin misericordia.

El a trata di gaña hasta riba Secretario di Estado Raymond Knops, cu ta Hulanda a bin cu e medida di saca 60 miyon pa aña for di cuido medico, elimina remedi di ciudadanonan pa despues resulta cu e plan aki tabata un propocion di e propio Evelyn.

Mescos cu el a insisti cu e sacrificio salarial di trahadornan publico lo ta algo cu lo dura te cu luna di december di 2020, pero despues ta bin resulta cu el a palabra cu Hulanda un biaha mas cu e sacrificio aki tin duracion pa “onbepaalde tijd.”

Pues ta tipo di cosnan aki ta pone pueblo mes kere un biaha mas cu e lider di MEP no ta sincero cu pueblo y tampoco cu otro partidonan politico y lo no ta ningun sorpresa cu su partido si tin e registro aki den su poder.