Stan Bossong cu un mensahe y iniciativa positivo

Stan Bossong ta un hoben di 19 aña, di decendencia Hulandes cu a crece na Aruba.

No hopi tempo pasa na mei, Stan a comparti publicamente riba su pagina di Facebook, cu su tempo na bida ta limita debi n’e hecho cu e tin cancer terminal di pulmon.

Esey no ta stop Stan di biba su bida lo mihor posibel, mientras e tin e ainda.

Su smile keto bay no a kita fo’i su cara y e ta gusta comparti momentonan bunita banda di su famia.

Den su publicacion el a menciona con bida por ta cruel, e por kita cualkier cos of hende na unda cu ta y na cualkier momento y sabiendo esey mester balora cada momento, traha hopi memoria bunita y ta agradecido pa loke bo tin awo prome cu bo no tin nan mas.

Gosa di bida, explora, haci e cosnan cu bo kier den bida mientras bo tin e oportunidad y e salud, sali fo’i bo ‘zona di comfort’ y laga los aki aya.

Esaki ta e mensahe cu e ta spera lo inspira hende eyfo pa biba un bida mihor y pa keda positivo, hasta den e partinan mas scur di bida.

Recientemente a bira posibel pa Stan pasa su ulitmo momentonan den e comfortabilidad di su propio hogar dor di un machine cu ta suministra morfina cada pas’un tempo via un tubo.

E tipo di cuido aki, ‘pallitative care’, lo ta e prome pa Aruba ya cu esaki normalmente no ta posibel.

Si un pashent ta sufri di cancer terminal aki na Aruba, e lo mester pasa su ultimo momentonan den cuido di hospital dor cu eynan so tin e tipo di machine cu ta suministra morfina y asina yuda suavisa e dolor c’e pashent ta experiencia.

Actualmente no tin modo di manda pashent cas den casonan asina, pasobra no tin machine extra necesario pa haci esaki realidad.

Pa yuda otro personanan cu cancer na Aruba den futuro, Stan su tata Ronald Bossong a organisa un pagina di GoFundMe, unda cualkier persona lo por haci un donacion.

“Dor di e hecho cu tin hopi otro pashent cu cancer rib’e isla, m’a crea e GoFundMe aki pa recauda fondo y asina provee mas machine y duna mas famianan e chens pa tin nan ser keri cerca.”

Por haya e pagina di GoFundMe riba Stan su pagina di Facebook como ‘Stan Bossong’, via e pagina di Facebook di su tata como ‘Ronald Bossong’, na https://gofund.me/10360a58 den browser of dor di manda donacion stret pa cuenta di banco CMB #603045702.

“Sometimes the strongest among us are the ones who smile through silent pain, cry behind closed doors and fight battles nobody knows about.” -Stan Bossong