Celebrity Millennium ta regresa Aruba e siman aki

E intencion tabata p’e crucero regresa nos isla te otro siman bek, pero…e recepcion, e protocolnan di salud y e calor di nos Arubianonan a haci cu Celebrity Cruises a dicidi e siman aki cu ta adapta e iterinario di Celebrity Millennium y ta regresa e siman aki mes atrobe.

E crucero ta sali for di Sint Maarten, ta pasa Barbados, Curacao y Aruba, pa despues regresa Sint Maarten atrobe. Ta obvio cu Aruba ta sigui halto riba e lista di wafnan mas gusta y preferi pa pasaheronan riba cruceronan. E atencion special aki y peticion pa un “call” adicional ta demostra e confiansa den nos isla.

Diahuebs awor, 17 juni, nos lo yama Celebrity Millennium bon-bini un biaha mas den nos waf. P’awor, Celebrity lo sigui bishita Aruba regularmente te cu augustus. A adapta tur nan protocolnan di salud hunto cu e instancianan di salud di Merca y tur e islanan unda nan ta bishita riba nan iterinarionan.

P’awor e cruceronan lo start den fase y cu capacidad reduci pa garantisa espacio natural. A introduci mas tecnologia moderno pa adapta nan proceduranan ora di check in y ora di bandona e crucero.

“Sigur cu esaki ta un desaroyo sumamente positivo pa nos isla, unda cu nos ta wak e parti aki di nos economia tambe recuperando. Aruba ta keda un destinacion preferi p’e turistanan crucero y esaki ta keda demostra un biaha mas.” asina Marc Figaroa, Director di Aruba Ports Authority a duna di conoce.

E turistanan ta gosa masha hopi mes aki y sigur nos lo kier pa nan regresa bek. Tin di nan hasta a considera Aruba como e mihor destinacion den henter e trip.

“Pesey ta importante pa Aruba sigui cuida y sigui baha e casonan activo di Covid. Menos caso activo nos tin, mihor prepara nos ta den protocolnan di salud, mas e pasaheronan lo sigui vota pa Aruba ta riba iterinario di e cruceronan como un destinacion perferi den Caribe”, segun Marc Figaroa a expresa.