Peticion pa mihor screening di politiconan abusador di menor pa evita pa nan bira Parlamentario of Minister

Ayera mainta un grupo di representante di Fundacion ‘End Child Abuse,’ a presenta na oficina di  Gobernador Alfonso Boekhoudt pa entrega un carta cu ta mas bien un peticion, cual carta tambe a wordo entrega na Parlamento, c’un peticion urgente segun e fundacion.

Splicando contenido di e carta ta entre otro cu nan ta pidi pa tur Parlamentario y Minister den futuro, pasa den tres diferente tipo di screening, pa di e forma aki ta cumpli cu e maneho di integridad cu politiconan ta papia asina hopi di dje.

Dos representante di e fundacion, esta Mijenou Tromp y Edwin Willems a drenta pa haci entrega di e carta na oficina di Gobernador, ya cu e fundacion ta sinti cu ya caba a yega di haci hopi promesa n’e fundacion, pero no a cumpli cu nada.  
A ser mustra cu e fundacion aña pasa a organisa un demostracion grandi pa mustra nan mal contento p’e forma con e sistema ta funciona aki na Aruba y riba e dia ey nan a haya hopi promesa, pero tur a resulta di ta promesanan falso.

Señor Edwin Willems a mustra despues cu nan a wordo informa cu Sociaal Crisis Plan a inverti 36 miyon florin pa atende cu problemanan social, pero e no a trece ningun tipo di beneficio pa muchanan y na mes momento a mustra cu no tin ni un Kinder Ombudsman pa casonan cu bay den doofpot.

Tur esaki, pero mas tanto e pasividad di e instancianan aki,  segun sr. Willems, a percura un disgusto grandi ya cu no ta bin cu solucion pa abuso contra muchanan.

El a sigui mustra cu nan tin nan propio pensamentonan riba pakico di e tardansa den binimento di solucionnan y tin biaha e procesonan ta wordo stroba dor di hendenan cu posicion halto den Gobierno, pa motibo cu nan ta meti den e casonan aki of nan ta tapa pa otronan.

P’e motibonan aki, e fundacion a dicidi di entrega un carta na Gobernador pa pidi un debido screening di politiconan pa mira si esaki lo por yuda crea mucho mas efectividad tanto di parti di Gobierno como Parlamento pa atene cu e situacion serio aki.

Loke ‘End Child Abuse’ ta pidi riba e tema delicado aki, ta transparencia, integridad y solucionnan y apesar di promesanan haci, apesar di Sociaal Crisis Plan, te ainda Voogdij tin lista largo di cliente caminda na final di cuenta nada a wordo haci.
Den e carta entrega ta papia di e motibonan cu nan a yega p’e tuma e paso aki y e tipo di screening cu nan ta pidi y den e carta ta papia di e lucha pa derecho di mucha.

A mustra situacion cu por a mira den ultimo añanan unda Minister, Parlamentario of coordinadornan na diferente ministerio, a haya nan mes den Corte pa acusacion di abuso sexual di muchanan menor di edad.

Tamb e tin politico cu den pasado a traha yiu cu muchanan menor di edad y nunca a wordo denuncia ya cu e mayornan a acepta of sconde e caso y awendia e ta miembro di Parlamento manera nada a pasa.

Mijenou Tromp di e fundacion a mustra cu e caso aki tambe ta parti di e contenido di e carta pa Gobernador, ya cu nan ta haya cu Parlamentario ta un funcion importante, e ta un representante di pueblo y ta masha importante pa nan ta integro, confiabel y tin un nivel di moralidad halto pa e funcionnan aki.
Den un forma energico sra. Tromp a mustra cu “si kier cambia leynan pa duna mihor sentencia na abusadornan y mihor ayudo na victimanan, mester elimina e posibilidad cu abusadornan por drenta Gobierno y podera di posicionnan importante y di poder.”

E fundacion ta haya tambe cu si Gobierno acepta algo asina, e ta manda un señal hopi negativo pa muchanan y henter e pais y no por acepta esaki como un forma nobo di biba.
Na mes momento e fundacion ta kere cu dor cu ta den un proceso electoral n’e momentonan aki,  nan ta haya cu t’e momento pa tur Minister y Parlamentario pasa den un proceso di screening cu ta consisti di tres parti y di e forma aki por cuminsa papia di integridad. Fundacion End Child Abuse ta urgi Gobernador pa haci tur lo posibel pa yuda para actonan di abuso sexual cu menornan.