Ta responsabilidad moral di Gobierno, Conseho Electoral y Censo pa minimalisa entrega di data personal di e populacion na tercer partido

Den pleno preparacion pa e eleccion cu lo tuma lugar dia 25 di juni 2021, Presidente di Conseho Electoral, drs. Glenn Thode ta informa comunidad di Aruba lo siguiente.

CARCHI DI VOTO

Riba e carchi di voto cu tur persona cu derecho di voto lo mester a ricibi awe caba, e biaha aki lo tin un QR code. E QR code aki ta pa yuda e eficiencia di e proceso di registra un persona cu a presenta pa vota. Esaki normalmente ta sosode na man den e Registro di Votado di cada urna.

Despues di e proceso di identificacion y registracion, un votador ta haya e stembiljet for di e Presidente di Urna, cu mescos cu semper ta blanco y no tin di ningun forma un coneccion cu e identidad di e votador.

E votador ta bay cu e stembiljet den e hoki y ta marca cu e potlood cora e candidato cu e kier duna su voto, y despues ta dobla su stembiljet y deposita esaki den e buzon.

SUGERENCIA DI ORARIO

Debi na Covid-19 y pa evita aglomeraccion, preparacionnan a wordo haci di antemano. P’e motibo aki riba e carchi di voto e biaha aki tambe tin un orario cu ta wordo sugeri pa yega na e urna electoral. Ora mayoria di persona acudi n’e urna riba e ora di sugerencia, lo por evita cu tin aglomeracion durante e dia di eleccion n’e urnanan. Esaki ta importante pa evita contagio di coronavirus.

Tene bon cuenta cu esaki ta un sugerencia y NO un obligacion. Si no ta posibel p’e votador yega n’e urna na e ora sugeri, por acudi na urna libremente entre 8’or di mainta y 7’or di anochi.

Si tin diferente persona cu ta biba hunto cu orario diferente, ta recomenda pa yega hunto riba e ora di sugerencia di e persona cu ta mas conviniente p’esnan cu ta biba hunto.

REGISTRO DI VOTADOR

Decision a wordo tuma cu no lo duna e partidonan politico copia di e registro di votador cu tur informacion personal y sensitivo di 70281 votador. E rason tras di e decision aki ta, cu ademas cu e no ta necesario p’e control cu lo mester a sosode antes ora tecnologia di identificacion no tabata tan avansa y e partidonan tabatin un control social den bario, cu Pedro no ta Pablo, e registro aki ta contene informacion personal sensitivo di 70281 votador, cu ta ser acumula p’e servicio di Censo di pais Aruba.

Pa un bon organisacion di nos eleccion, control di identidad di e votador cu ta yega urna electoral, y uso di e derecho di voto solamente un biaha, no tin necesidad di sosten di checkers manera antes. Uso di identificacionnan moderno y uso di Registronan electronico moderno y tecnologia certifica y avansa ta garantisa e proceso confiabel di eleccion y ta percura p’esaki, y ta den man di e Presidente y miembronan di urna.

Ora comparti e informacion personal aki cu un partido politico, ta perde di bista kico exactamente t’e forma y limite di uso di e data sensitivo aki. Uso inapropia y contra nos derecho constitucional di voto liber, por ehempel busca un hende na su cas cu no a yega urna ainda, p’esnan cu haya e data aki den nan man ta sumamente facil. Uso y analisis di e informacion personal mas sofistica cu esaki tambe lo ta posibel. E derecho di proteccion di data personal ta un derecho fundamental di sernan humano cu te cu aña 2017 no tabatin proteccion di derecho internacional y legal mes fuerte cu awe.

Ta responsabilidad moral di Gobierno di Aruba, di Conseho Electoral y di Censo pa minimalisa entrega di data personal di e populacion na tercera partidonan si esaki no ta necesario pa buena marcha di un proceso y den esaki p’e proceso electoral.

Traspaso di e data no ta necesario pa un buena marcha den e eleccion manera nos por wak esaki na otro paisnan den Reino por ehempel Bonaire, St Maarten y Hulanda. E control por sigui den buena marcha cu of sin e presencia di checker, pasobra tur hende sa cuanto votador tin na cada urna.