Impact Taekwondo bou guia di Monica Pimentel a avansa cu training

Monica Pimentel di Impact Taekwondo a avansa cu training cu e speransa cu e Pan American Youth, Cadet & Ultra Championships lo tuma lugar despues di vakantie. Kianna Krosendijk, Ingomar Jacobs, Deevah Loefstop, Ayleen van Geene y Alisha van Geene t’e 5 atletanan di Impact Taekwondo cu a clasifica.  

Covid-19 a haci cu mundo completo a wordo paralisa y tur evento a wordo cancela. Esaki a haci cu nos no por a representa nos pais. Awor cu Merca a vacuna na gran escala, e camp trainingnan a cuminsa tuma lugar. Nos ta spera cu nos por logra competi e aña aki ainda.

Nos atletanan a sigui train pa mantene nan mes activo y pa tene nan mes flexibel. Awor cu Gobierno a flexibisa e reglanan pa deporte na Aruba, ta haci cu nos por train bek n’e nivel cu semper nos a train.

Cu esaki den mente nos lo sigui prepara pa nos metanan pa bin mas duro den 2022. Pa nos logra nos metanan nos lo cuminsa bek cu nos actividadnan pa recauda fondo p’asina representa Aruba. 

Pa tur esnan cu ta interesa pa join nos team di Impact Taekwondo nos ta train na Scol Basico Washington tur diamars y diahuebs for di 5’or pa 6’or y mey di atardi. Nos tin un grupo di mucha te cu adulto.    Pa mas informacion semper por subi nos Facebook Impact Taekwondo Aruba.