Minister di Salubridad a ricibi raport cu conseho con pa reduci gasto

Representantenan di cuido medico ta sumamente orguyoso y satisfecho cu a completa e raport di conseho basa riba e ultimo peticion di Gobierno di Aruba na fin di mei 2021. Ayera mainta a tuma lugar entrega di e raport aki na Minister di Salubridad, sr. Dangui Oduber compaña p’e respresentantenan Aruba su sector di cuido medico.

E encargo cu a sali for di e Decreto Ministerial n’e comision aki tabata pa ‘duna conseho encuanto alternativanan con pa reduci gasto relaciona cu implementacion di e 5 wave model cu a ser traha pa UO AZV’.
E documento di conseho cu a ser otorga ta brinda alternativanan cu ta sigui e implementacion di e “AZV – 5 model”.

E diferencia grandi di e conseho otorga compara cu e “AZV – 5 model” ta cu awor si ta mantene e calidad di cuido. Ya tin algun reduccion tumando lugar riba corto plazo y e caracter structural di e reforma nan ta pone cu riba termino largo e efectonan di reduccion pa Aruba lo ta mas ainda cu loke por ser logra cu e “AZV – 5 model”.

Sector di cuido medico kier enfatisa cu e cortamento di 60 miyon cu ainda tin riba cuido ta haci hopi daño riba e calidad di cuido na comunidad di Aruba. Tambe e ta nifica cu no tur cuido por wordo duna na comundiad di Aruba cu tur su consecuencianan cu esaki ta trece cune.
E document di conseho aki ta demonstra esey. Ta duna tambe oportunidadnan pa un mihor cooperacion, sincronisacion, eficiencia y inversion pa mehoracionnan structural dentro di e sector .

Y tambe pa medio di un colaboracion mas extenso cu AZV y Gobierno por hiba Aruba na ta un isla mas saludabel.  E sector di cuido medico ta mira e conseho aki como un comienso pa un cambio fructifero den e organisacion di e sistema di cuido na Aruba. Asina den futuro tin un Aruba medico y financieramente saludabel pa tur Arubiano y e sector turistico cual ta esencial. Durante otorgamento di e documento, Minister Dangui Oduber a gradici sr. Ronnie van Trigt como Presidente independiente di e comision y tambe tur partner den cuido pa nan empuhe y confiansa.