Otmar Oduber dialogando cu varios partido chikito riba posibel Gobierno di coalicion cu MEP

“E por dialoga cu varios partido chikito, pero ni pensa mes pa bin dialoga cu partido MAS,” tabata un di e contestanan cu nos a ricibi na momento cu AWEMainta a haya informacion cu ya tin dialogo a tuma lugar, pa un posibel Gobierno di coalicion sin partido AVP.

Loke ta interesante di e asunto aki, segun bon fuentenan a duna di conoce na AWEMainta, t’e hecho cu ‘of all people’ ta Otmar Oduber ta hibando dialogo cu varios partido chikito den nomber di partido MEP,  riba e posibilidad pa un cooperacion p’asina forma un coalicion despues di eleccion pa goberna e pais.

Un di e promernan cu nos a logra di tuma contacto cune, ta un representante di partido MAS, kende simplemente a mustra cu cualkier intento di Otmar Oduber pa un dialogo of posibel acuerdo pa forma un coalicion, lo ta inceptabel pa partido MAS.

E solo hecho di tur loke ya a tuma lugar cu e lider di e partido Marisol Lopez Tromp for di tempo di POR y e forma con partido di MEP a core cune como Minister y hasta a purba di ehecuta un mocion di desconfiansa contra di su persona, ta elimina e posibilidad aki totalmente.

Tin minimo tres pa cuater partido cu e fuente a mustra na AWEMainta cu dialogo a tuma lugar of lo bay tuma lugar, dirigi p’e ex lider di POR, kende lo ta hibando e dialogonan aki den representacion di e lider di MEP, Evelyn Wever Croes.

Lo tin dos lider cu a mustra di ta dispuesto pa sigui papia y hasta yega na un acuerdo, pero tin otronan cu lo a bisa cu nan no kier compromete nan mes n’e altura aki y lo kier warda resultado di eleccion pasa pa mira ki decision lo wordo tuma.

Den e contaxto aki tambe tin cu mustra cu partido RED tampoco a wordo acerca mirando e experencia cu e partido tabatin cu MEP caba, caminda lider di e partido, Ricardo Croes, a mustra na varios ocasion, cu e partido geel no a respeta y acuerdo di gobernacion cu e tres partidonan a firma pa forma un coalicion.

E ley di canabis medicinal tampoco a keda cla, mientras cu na varios ocasion despues di caida di Gobierno y hasta durante di gobernacion mes, cu sr. Ricardo Croes a cuestiona integridad di partido MEP acusando nan di varios asunto incorecto.

Poco ta compronde e decision di e ex lider di POR pa bolbe mete su mes den politica y sali dilanti pa sostene e partido di Evelyn Wever Croes, pero aki tambe por a scucha comentario- y observacionnan cu esaki lo por tin di haber cu e caso Flamingo den cual tin investigacion andando segun Ministerio Publico.

Desde cu lider di MEP a core cu Marisol Lopez Tromp como Minister di Infrastructura y a hala e cartera aki pa su persona mes, no ta tende di ningun progreso den e investigacion aki y tur cos ta mustra cu e asunto aki lo bay den doofpot y cu e investigacion lo para dado momento, sigur mirando e envolvimento y dedicacion di Otmar Oduber n’e campaña di e lider di MEP.