Den e campaña electoral aki e clase trahador ta ausente

Pa: Gregorio Wolff

Den e dianan aki nos ta bibando na Aruba un periodo hopi bruha den e campaña electoral, pa e eleccion di dia 26 juni.

Di con bruha, pasobra PROME nos tin 12 partido  cualnan ta pidiendo pueblo pa vota pa nan. Un tendencia mundial p.e Hulanda cu banda di 80 partido y na Corsow + 15

Ta bisto cu hopi persona ariba lista di partidonan no tin e conocimento di politica y pesey nan ta ilusionista, nan tin un ilusion cu nan por drecha algo, anto sin tin un plan of programa con pa hacie, nan ta kere cu algun lema  y frase ta bastante.

Topiconan hopi gusta den e campaña electoral aki.

Politiconan ta traha cu sentimento di pueblo na e momento aki, manera poniendo hopi accenta ariba corrupcion pa motibo di 2 exministro di un partido,  sera y/of wardando su caso di apelacion pa motibo di corrupcion, tambe ecologia cual ta un tema cu pueblo gusta scucha hunto cu Industria nobo di energia limpi. Otro carateristica cu a Sali na cla ta e politica di  Window Dressing esta nan ta decora solamente cu palabra. Den politica  e ta wordo yama e formalidad bashi, e contesta  no tin contenido of un contesta cu bo por splica manera bo kier.

Otro topiconan cu nos ta tende y lesa durante e campaña aki ta entre otro:

Integridad den gobierno, lubidando integridad den sector priva y den otro organisacionnan.

Nan kier papia di baha impuesto a pesar di nos debenan grandisimo.

Flexibilisacion di labor, esta ta tuma trahador den servicio y ta kite ora e patron ta haya ta bon, esaki ta un exigencia di dunadornan di trabao, vocifera pa cierto politiconan.

Hopi kier un sistema di procesa desperdicio limpi y duradero, pero hopi no ta of no kier paga  su cuota na Serlimar.

E campaña politico na Aruba awe mas bien por ser considera un guera ariba lemanan, kendenan ta formula mas mihor of mas bunita, kende tin e mihor oradornan ariba cierto tereno, hunto cu esakinan fanfaria-y teatronan.

Falta di ideologia y programa politico.

Di DOS por bisa cu den lineanan grandi mayoria di e partidonan no tin un programa,  pero ariba hopi issue=lema nan tin un posicion.

Mundo politico sigur a aleha di e ideologia politico pesey ta algun partido ta bisa cu nan tin ideologia. E falta di ideologia ta un asunto cu ta cuadra cu e epoca cu nos ta biba aden. Nan ta moderno y tin ta bisa cu nan tin un vision y un mision pa e proximo periodo di gobernacion. Defacto nos por bisa cu mayoria di partido ta pensa igual, solamente e personanan ta otro, tin ta bisa den nan palabranan cu nan  ta sabi, otro  cu hopi diploma, otro cu estudio halto. Tin partido sin ideologia y sin programa ta funciona cu un bon marketing ariba red social y nan ta mik ariba e Hubentud cu no tin un huicio politico ainda.

Tambe e programa di e cierto partidonan no por ser considera un programa politico ya cu e ta yen di elogio di loke nan a haci den pasado, mientras eleccion ta pa goberna e pais aki den futuro. Esey ta pone partidonan no ta cumpli cu e ingredientenan di un partido politico correcto  awendia den siglo 21.

Di tres di con bruha, e trahadornan kendenan ta forma mas di 90% di e votadornan a ser lubida grandemente, futuro politiconan no a waak den ki posicion nan ta awe, tampoco e desaroyo socio-economico na Aruba, cual ta hincando e trahador den un skina.

Programa di PPT na 2005.

MI ta haci mencion di e partido PPT (Plataforma Politico di Trahador), na 2005,  PPT tabata e unico partido cu un programa. Mi ta e presidente di e partido aki y nos programa grandi consisitiendo di banda di 40 A-4,  cual a wordo impremi na miles, tabata consisti di primeramente e hustificacion=motibo pakico un partido di Trahador.

Despues, como un analisis di e situacion na 2005, nos programa a mustra ariba e presupuesto di Aruba pa 2005, e indicadornan socio-economico di Aruba for di 1986 pa 2004, tambe un analisis di e crisis politico na Aruba, hunto cu e situacion di trahadornan.

Pakico e puntonan aki ta importantisimo, pasobra bo tin cu Sali for di e realidad na e momento nan ey, na 2005.

Despues nos a mustra e diferente asuntonan cu politica mester atende pa mehora nan.

Asuntonan hopi  amplio y importante.

Mi ta menciona algun punto imortantantisimo di e programa di accion di PPT:

Amplia nos democracia y e defensa di e estado di derecho democratico.

Dialogo ta indespensabel pa busca solucion pa problema-y conflictonan.

Con pa mehora e Cultura laboral na Aruba.

Ratificacion di Conbenionan  di ILO pa mehora e Campo Social.

Derecho di bida na nivel acceptable.

Defensa di nos autonomia y creacion di Nation Building.

Finanzas Publico con pa mehore

Nos vision pa e Desaroyo Economico y mehora e indicadornan economico pa e trahador.

Arte y cultura un derecho

Salubridad Publico y Campo Educacional.

Lastimamente nos pueblo no ta gusta lesa, tambe un campaña politica sin placa a haci cu nos tremendo programa no a ricibi su atencion y pueblo a sigui e campañanan caro di otro partidonan, esta  loke placa tabata comanda  pa sigui. PPT sin placa a luci perdi. 

Kico mester a discuti entre e 12 partidonan

Nos a sigui e diferente encuentronan entre politiconan, no a duna mucho atencion na asuntonan, cualnan na mi opinion, politiconan y pueblo mester pone atencion awe.

Mi ta menciona e acuerdonan cu gobierno tin awe manera:

Landspakketten Aruba, cual ta un paquete di medida a corto plaso y cambionan structural a largo plaso;

COHO (Caribisch Orgaan voor Hervorming en Ontwikkeling); 

Presupuesto 2021;

Asuntonan di Covid-19;

Tur ta asuntonan cu no a ricibi atencion of poco atencion durante tur e discusionnan entre politiconan, pero bo ta bay topa nan ora di goberna. Porta e fayo mester ser busca serca e organisadornan/moderadornan.   

Un asunto cu sigur no a ricibi atencion durante e campaña aki ta e situacion di e trahador Arubiano. Hopi a papia di pobreza cu sigur ta existi, ya prome cu e pandemia.

No a menciona e Desaroyo Socio-Economico unda e trahadornan ta para awe.

Na final di e articulo mi ta publica e indicadornan Socio-Economico, con e desoroyo economico tabata di 1986 pa 2019, unda e trahador a sirbi solamente pa produci un GDP hopi halto, pero e mes a ricibi un parti chikitu di loke e a produci.

Ningun politico a papia pa defende e Leynan laboral na fabor di e trahador, si a papia pa kita trahador for di trabao na beneficio di e dunadornan di trabao, pues e trahador no tin balor.

Tampoco di e Conbenionan di ILO, cualnan ta asina esencial pa defende e trahador  y tambe e Leynan social cualnan ta necesario, considerando tur e problemanan social.

Privatisacion o mas servicio publico

Den e discusionnan y for di posicion di diferente politico nos por a tende/lesa cu nan ta pro  e Neo-liberalismo, esta haci gobierno mas chikitu dor di pasa empresanan y servicionan publico pa sector priva, privatisacion.

Nos a waak/tende esaki  di e partidonan Red, Raiz, A-21, PPA, Curpa, mientras AVP ta conoci  pa ta un partido cu ta privatisa.

E realidad na Aruba awe, ta mustra cu e privatisacion mester di un discusion profundo:

Paisnan rico tin hopi Servicionan publico pa ofrece na su pueblo y Paisnan pober cu menos of casi nada di servicio publico pa su pueblo.

Awe nos por wak e berdad crudo na mundo, e paisnan cu menos of casi nada di Servicionan publico, manera ta e caso na Africa,na Asia y na America manera Haiti, tur ta paisnan pober.

E Neo-liberalismo ta comanda e ideologia di mercado cual a y ta  contradeci e surgimiento di Servicio Publico, ya cu e ideologia di mercado ta wak Servicio Publico como un mercancia, cual ta ser compaña cu refuerzonan ideologico cu hopi di nos politiconan na Aruba, inconcientemente ta acepta y después vocifera.

Un papa di Roma a yama e neo-liberalismo e “capitalismo salvahe”, pasobra e no ta tene cuenta cu hende, pero solamente cu e ganashi pa riconan. 

Di otro banda nos ta haya e paisnan rico manera ta e caso di e paisnan den Europa, sigur na e parti occidente, manera Alemania, Francia, Inglatera, Hulanda Belgica y mas país, tambe na e paisnan Nordico, Suecia, Finlandia, Dinamarca y Noruega, acerca Merca y Canada tur ta paisnan cu  Servicionan Publico grandísimo, tur ta paisnan rico cu bienestar pa pueblo.

E modelo mas fuerte di Estadonan moderno di bienestar pa nan pueblo, cu Servicionan publico grandísimo  ta esun Nordico. Tin varios caracteristico: un politica social cu ta abarca un campo amplio cu ta inclui seguridad social, servicionan social y di salud, educacion, vivienda, empleo, etc., cu enfasis den pleno empleo, hunto cu e politica activo riba e mercado di trabao, y e derecho universal di tur e ciudadanonan di ricibi, independiente  di su situacion laboral, servicionan y prestacionnan di e seguridad social, complementa pa beneficionan relaciona cu e ingresonan di trabao.

Servicionan publico ta ser financia principalmente atraves di placa di belasting.

Aruba mester tuma e paisnan aki como ehempel.

Pues grandura di bo Servicionan y bo Empresanan publico ta caracteriza bo país, como país rico  of país pober. Ignorancia of locura ta e motibo serca cierto persona pa vocifera e idea di privatisacion na gran escala. Pa e trahador conciente “Privatisacion ta un palabra malo”.

Cu gobernacion na Aruba mester bay funciona mas eficiente y eficas, ta berdad.

 Algun notanan critico, otronan chistoso ariba e actitud di “nos futuro politiconan”.

Un lider di un partido ta declara cu su gobierno lo  percura pa universidad na Aruba lo conta cu 60 facultad.

Un observacion personal ta mustra cu mayoria di politiconan ta waak su posicion como politico, como un ofishi cu ta dune bon entrada y beneficionan, no pa sirbi su pueblo.

Ursell Arends Raiz. “Mester habri dialogo pa sector publico y sector priva tene combersacion serio tocante con por absorba cierto servicio nan cu por pasa over pa e sector priva, cu sigur lo por maneha esaki eficiente. Sigur cu mihor entrada y condicion di trabao cu awe nan tin den sector publico”.

Wel como lider sindical mi sa, cu sector priva ta paga su trahadornan hopi malo mes.

Un partido ta carga e nomber RAIZ, pero cada biaha ta mustra e simbolo di Reis(nan). Pa hopi hende e palabra spaño RAIZ lo ta zona mas bunita cu REIS, un palabra na papiamento.

Dos partido PPA y MAS a bisa cu nan no ta bay traha den un gobierno cu AVP, ni cu MEP.

Bo ta vota pa bo partido bay goberna. MEP of AVP sigur ta bira e dos partidonan mas grandi, uno sigur ta den gobierno. Pues un voto pa PPA of MAS ta un voto benta afor.   

HTC y RED, nan lidernan ta contra corrupcion, pero nan tin exponentenan ariba lista, cu ta apoya NEPOTISMO=CORRUPCION den un organisacion, cu mi ta miembro.
Sigur e lidernan di partido tin trabao duro pa re-educa e dos personahenan aki.

AVP cu gunst, un compensacion pafor di e salarishuis pa tur maestro, asina Avp drenta gobierno. E pregunta, con a para cu e ambtenaar, e werkster, e trahador di fundacion? 

“Deal Smoeltje Dicht”

E lider di MAS ta hunga kabuki teatro, unda su show di spiritu y corrupcion ta caracterisa algo sin contenido. Ora bo waak e persona, MLT, como ministro di MEP y di Dip, como 15 aña pasa, di ripiente un tereno grandi den e Groengebied di Kamay ta desaparece. Mas  despues e ta aparece como tereno eigendom di 4 Mericano rico. Kico a pasa aki anto? “QUID PRO QUO”? Un favor pa otro favor of mi ta duna bo algo y mi ta haya algo bek.

Tambe tin e caso di e deal di e banco Interbank cu 15 aña largo mi ta haci pregunta, pesey awor mi ta yama e “Deal Smoeltje Dicht”. Awe nos ta tende cu e lider di A-21 a declara cu na su 29 aña a bira miyonario. Nos a tende tambe e informacion, no confirma,  cu e doñonan di Interbank a saca banda di 68 miyon florin for di banco Interbank, consecuentemente e banco aki mester a bati bancarota.  Pero cu ayudo di Banco Central cual instituto no a haci su trabao dor di uza e Landsverordening Toezicht Kredietwezen y cu apoyo di politiconan di AVP na 1999, Gobierno di Aruba a cumpra Interbank pa un floro. Prijs rediculo(1 awg) pa un banco. Gobierno despues ta pasa e banco pa FCCA.

Anto na 2004, ata MLT como ministro di Mep y di FCCA ta e autor intelectual, unda FCCA ta bende Interbank cu un banco local y FCCA ta fia 55 miyon floro pa paga e banco. Cuanto?

Aki tambe sigur tabatin e  “QUID PRO QUO”.

Loke cada biaha, mi ta spera cu porfin ta bay kibra e “Deal Smoeltje Dicht”.

E dolor mas grandi ta cu esnan pober cu no tin propio cas, pero ta hur cas na FCCA, tambe esnan cu no por ricibi un hypotheek cu interes abao na institutonan financiero, mester a tuma hypotheek di FCCA cu interesnan mas halto pa paga bek e 150 miyon floro, pasobra como 16 aña pasa e interesnan pa fia placa tabata basta halto. PICA!!   

Algo riparabel ta  cu hopi biaha nos a weita un feint, un schijnbeweging den palabra, ora bo ta fingi algo, pero no ta hacie. Ami ta bisa,  laga esaki, e “schijnbeweging” pa futbolistanan.

No tin posicion na fabor di e clase trahador.

Finalmente mester bisa cu posicionnan na fabor di trahadornan Arubiano tabata ausente den e campagna electoral aki. E trahador a luci bandona y perdi. Pa e motibo aki mi ta pidi atencion di politiconan pa duna atencion na e indicadornan economico di Aruba for 1986 te cu 2019. E ta hopi importante ya cu e ta indica con e maneho politico a bay durante cada aña y tambe durante un periodo. Na un otro ocacion lo splica mas profundo e indicadornan

Dor di e pandemia, pa 2020 y 2021 no tin informacionnan cu por ser compara.

Claramente ta bisto con e posicion di e trahador a keda bay atrás den Status Aparte.