SER ta publiká estudio riba ‘Kontribushon di migrantenan na desaroyo sosio-ekonómiko di Kòrsou’

WILLEMSTAD – Dia 11 di yüni 2021 Konseho Sosial Ekonómiko (SER), a hasi uso di e posibilidat ku artíkulo 2, insiso 3, di e ordenansa ku ta regla e institushon, komposishon i funshonamentu di SER (P.B. 2010, no. 87 anekso p, manera adaptá den P.B. 2017, no. 70) ta brinda i a bai di akuerdo pa publiká un estudio titulá: “Kontribushon di migrantenan na desaroyo sosioekonómiko di Kòrsou”. E estudio aki t’e di dos di e serie “Migrashon i Desaroyo Sosioekonómiko di Kòrsou” i ta basá riba un investigashon ku SER a hasi tokante e aporte di imigrantenan legal na desaroyo sosio-ekonómiko di nos isla.

E promé estudio titulá “Futuro di AOV” a ser publiká na maart 2020. Den e estudio aki SER a hasi un análisis profundo tokante di e sostenebilidat finansiero di e fondo di Penshun di behes (AOV). Den e kuadro aki SER a hasi uso di diferente senario di migrashon pa futuro. Un konklushon importante ku a sali for di e diferente proyekshonnan ta ku imigrashon legal por ta bentahoso pa sostenebilidat i durabilidat finansiero di e fondo di penshun di behes AOV. Un otro konklushon ta ku mester tuma medidanan ku urgensia pa hasi e fondo di penshun di behes sostenibel pa futuro i ku no por sigui posponé esakinan.

E estudio aktual ta basá riba un aserkamentu históriko unda a investigá e forma kon olanan migratorio a yuda desaroyo sosio-ekonómiko di Kòrsou durante e último dékadanan. Ku esaki SER ta spera di por pone un base sólido pa formulashon di un maneho integral pa ku e tema di migrashon i su balor pa ku desaroyo sosioekonómiko. Den e di tres i último estudio, ku lo sali mas lat e aña aki, lo enfoká en detaye riba kon e tema di imigrashon ta relatá su mes na e ‘desahuste’ (‘mismatch’) ku tin entre loke nos sistema di enseñansa ta produsí na abilidat i kompetensia i loke nos merkado laboral ta eksigí. Pa basta tempu kaba ta konstatá ku e abilidatnan i konosementu ku muchanan ta sali kuné for di skol no ta kumpli ku eksigensia- i rekisitonan di nos merkado laboral.

Ya pa basta tempu kaba e problemanan sosio-ekonómiko relatá na migrashon tin debido atenshon di SER. Na mei 2019 e konsehonan sosial ekonómiko, e SER-nan pues, di Aruba, Kòrsou i Sint Maarten a uni forsa i konhuntamente a organisá un simposio titulá “Migration and Socioeconomic Development, Policy Challenges and Options” kual a tuma lugá na Willemstad, Kòrsou. Den e simposio aki a pone atenshon na diferente aspektonan relatá na migrashon ku énfasis partikular na migrashon laboral. E simposio a kondusí na vishonnan, konosementu i relashonnan balioso, ku tin un balor agregá den formulashon di maneho riba tereno di migrashon laboral. Ta di sumo importansia pa aserká e tema aki en konekshon ku maneho riba tereno di merkado laboral, maneho di enseñansa i polítika demográfiko. Den e konteksto aki integralidat, konsistensia i efektividat ta puntonan di salida esensial. Datos y pruebas.

Ku e di dos estudio ku a ser publiká e siman aki, SER ke sigui duna un aporte sientífiko, basá riba dato- i pruebanan, n’e diskushon tokante opshonnan di maneho pa ku migrashon i su impakto riba desaroyo sosio-ekonómiko di Kòrsou. E estudio aki ta basá pa un gran parti riba data optené for di e último senso ku Ofisina Sentral di Statistik di Kòrsou (CBS) a hasi na aña 2011, komplementá ku datonan for di e periodo di 2014-2018.

Publikashon di e estudio aki tabata planiá pa tuma lugá djis despues di publikashon di e promé estudio riba AOV na mart 2020. Sinembargo, debí na e krísis okashoná pa Covid-19, SER a haña su mes konfrontá na 2020 ku bastante petishon pa konseho di karakter di urgensia, tantu for di parti di gobièrnu komo for di frakshonnan den parlamento. Pa e motibu aki e publikashon di e estudio aktual i di e otro estudionan a ser prolongá.

Por haña e estudio “Kontribushon di migrantenan na desaroyo sosioekonómiko di Kòrsou” riba wèpsait di SER: www.ser.cw