Universidad di Aruba ta organisa ‘career event’ online pa tur studiante

Dia 21 di juni dialuna awor, como parti di e ‘undergraduate bachelors program’ Organization, Governance and Management (OGM), Universidad di Aruba lo tene su prome ‘Career event’ online pa tur studiante di Aruba. E evento lo tuma lugar di 7’or te cu 9’or di anochi via Zoom.

Lo tin diferente orador presente incluyendo sra. ir. Yvonne Lee-Perez, mr. Michael Tromp, sra. Christel Croes, sra. Maria Dijkhoff-Pita y sra. Kimberly van Loon. Lo tin graduado di OGM cu lo conta di nan experiencia como studiante y awendia como profesional den nan trabou.

Tambe lo tin profesional di sector publico y sector priva cu lo conta di nan experiencia como profesional y nan expectativa pa studiante di OGM na momento di drenta mercado laboral of haci pasantia.

Lo tin un sesion special tambe p’e studiantenan di OGM cual lo ta un sesion tocante un oportunidad di carera cu un organisacion local, segun Nurianne Arias, docente di Facultad di Arte y Ciencia.

E evento aki ta totalmente gratis pa tur studiante di Aruba – sea HAVO, VWO, Universidad di Aruba, EPI, ‘high school’ entre otro of esnan cu por ta trahando y ta desea di sigui studia. Por haya informacion incluyendo e QR code riba e pagina di Facebook di OGM @University of Aruba: Organization, Governance and Management, e QR code por haya riba e potret inclui cu e articulo aki tambe. Por haya nan riba Instagram @ogm_ua.