Muher Brasileña yiu di tata Hulandes a pèrdè su nacionalidad

WILLEMSTAD – Dia 21 di yanuari aña pasá un señora Brasileña, kende ta mama di dos yiu di 13 i 10 aña respektivamente kendenan tur ta biba na Brazil a pidi pa por haña pasaporte Hulandes, pasobra tata dje muher ta makamba, pero gobiernu a ninga di duna nan pasaporte.

E kaso a tuma lugá den Korte na Amsterdam kaminda un abogado Brasileño a bringa e kaso pa su kompatriota usando traduktor, pero en vano: Gobiernu a keda insisti ku e muhé i su yunan no por haña pasaporte Hulandes.

Por sierto ku e kaso a tuma lugá via transmishon  di televishon pa motibu di e peliger di corona.

Tata dje muhé tambe tabata presente den Korte na Hulanda komo informante.

E señora Brasileña a haña nashonalidat Hulandes dia el a nase, pasobra su tata ta makamba.

El a keda biba na Brazil pero fo’i dia el a bira mayor di edad el a mantene laso ku su famianan na Hulanda.

Regularmente el a bai Hulanda pa bishita su famianan i orientá su mes riba un futuro komo habitante di Hulanda.

E tabatin pasaporte Hulandes i a prolongá esaki regularmente pasobra e tabata biaha diferente biaha pa Hulanda. El a buska trabou na Hulanda komo fisio terapeuta i ta duna lès den ‘pilates’.

‘Pilates’ ta un sistema di fitness ku a bin na moda siglo pasá i su promotor  yama  Joseph Pilates, kende a yama su método Contrology, pasobra e tabata konvensi ku serebro di hende ta dominá muskulo.

El a solisita na Hulanda i por duna lès na Hulanda, pasobra e tin number di seguro sosial Hulandes.

Na 2007 el a kasa na Brazil i a haña su dos yiunan pero su kasá a muri repentinamente na 2015 i bou dje sirkunstansianan ei el a lubidá di renobá su pasaporte.

Segun Consulado Hulandes e pasaporte a vense tres luna kaba, pero e señora ta insisti ku e no por pèrdè su nashonalidat Hulandes pa motibu dje fayo ei.

Ku su pèrdida di nashonalidat, su yunan tambe a pèrdè nan nashonalidat Hulandes.

Sinembargo servisio di Imigrashon a deklara ku e pasaporte a vense despues di 10 aña sin ku e muhé a tuma paso pa renobá esaki na tempu i el a biba mas ku 10 aña sin interupshon na Brazil i pa regla el a pèrdè su nashonalidat.