Accion 21 kier 12 asiento como base y RAIZ ta kier mas cu dos Minister

Awe ta casi un siman cu pueblo a vota pa un Gobierno nobo, pero ainda no tin algo concreto relaciona cu e Gobierno di coalicion cu mester wordo forma.

Sinembargo for di e rondanan di discusion cu Gobernador, por a saca afo for di lidernan di e tres partidonan, cu drs. Marisol Lopez Tromp t’esun cu tin mas experencia y ta haci declaracionnan hopi bon calcula y no ta bin dilanti y atende cu puntonan cu e no ta domina.

E ta lidera partido MAS cu a logra dos asiento diabierna ultimo caminda en realidad Marisol practicamente a logra e resultado aki practicamente su so, superando e barera di 4 mil voto personal p’asina sigura un asiento y un restzetel.

Henter comunidad ta na altura cu e lider di MAS dificilmente lo por forma un Gobierno cu partido MEP, cu a core cu su persona na mal ordo p’e simpel hecho cu su persona a para pa integridad y a denuncia decisionnan tuma pa su coleganan Minister den Gabinete Wever Croes, loke a tuma su persona na malo.

Marisol no a compromete su mes na ningun ocasion, pero ta bisto e rumbo cu e lo por bay den un posibel Gobierno di coalicion, mientras cu e dos otro lidernan, cu ta Ursell Arends di parti di RAIZ cu a logra dos asiento y Miguel Mansur di partido ACCION 21, si a haci declaracionnan controversial cu no ta sirbi interes di e partido.

Pa cuminsa cu Ursell Arends, diaranson mainta despues di a reuni cu Gobernador Boekhoudt, a declara cu su partido RAIZ no ta parti di ningun complot politico, indicando aki na declaracion haci p’e lider di Accion 21, Mansur cu den fin di siman lidernan di e tres partidonan chikito cu a saca 5 asiento, lo reuni y forma un bloke pa bay negocia cu e dos partidonan grandi.

Mesora drs. Marisol lider di MAS a coregi e lider di Raiz mustrando cu no tabatin ningun complot y cu probablemente Arends no sa kico ta nifica un complot, indicando cu loke su persona a pasa aden cu Gabinete Wever Croes, esey tabata un complot pa baha su persona y loke a tuma lugar tambe.

Ta for di prome cu eleccion caba a liga RAIZ na partido MEP y AWEMainta for di siman pasa a wordo informa cu ya tin negociacion tumando lugar entre un representante di e lider di Raiz, cu hendenan di MEP riba un posibel acuerdo di cooperacion.

Ursell Arends mes a nenga esaki rotundamente, pero ayera a bolbe surgi e informacion aki y hasta a yega na conocemento di nos redaccion, cu e partido ta exigi dos of mas Minister pa por forma parti di cualkier coalicion cu MEP.

Ta un asiento RAIZ a saca den ultimo eleccion di cual uno ta un restzetel y pa bin dilanti y exigi minimo dos pa tres ministerio, ta algo di mas pidi y aki ta mescos cu kier cambia koper pa oro mientras cu simplemente e no por wordo hustifica.

Mas ainda ora cu e propio lider, Ursell Arends aki den otro declaracion a sigura cu su partido ta para pa integridad den gobernacion, pero na mes momento den su mente di integro, Arends ta haciendo su mes culpabel na un tipo di “extorcion politico” cu ta demostra un falta di integridad total.

ACCION 21

Miguel Mansur tambe di partido Accion 21, despues di a sali for di oficina di Gobernador a declara cu su partido cu e unico asiento cu el a logra, pa participa den un Gobierno di coalicion, ta exigi p’e coalicion aki ta conta cu minimo 12 asiento.

Mansur no a bisa cu si esaki no logra si e lo bay oposicion den Parlamento, pero aki atrobe ta mustra un mentalidad politico cu no ta na su lugar, ya cu Accion 21 no tin un mandato cla di pueblo pa por haci e exigencianan aki.

Ta un solo asiento partido di Mansur tin y bou di ningun circustancia e por insisti con un coalicion mester wordo forma ya cu e mester t’e ultimo pa wordo yama pa forma un coalicion.