Artistanan Kulchaman y Suhcy ta debuta cantica nobo bou Palms Up Records

Dialuna pasa, artista Kulchaman (Denzel Browne) y productor di musica SUHCY (Nigel Hoek) a saca nan prome cantica ‘Melanin’ bou Palms Up Records, cual nan a firma recien cu nan.

E cantica a haya hopi apoyo y critica positivo di hopi hende rond Aruba, den 24 ora e video a gana 7 mil bishita caba.  El a wordo componi pa Kulchaman mes y ademas produci, gemixed y engineered pa SUHCY. Por hay’e cantica riba YouTube na canal di JulianspromosTV | Soca Music.

Kulchaman tin otro hit di soca cu a sali den pasado caba manera ‘Get On Bad’ hunto cu Sky, un artista di Grenada. Suhcy a yega di traha riba hopi otro cantica tambe manera e hit ‘Wuk’ di Freddy Rasta y Galloway, incluyendo e remix internacional Caribense cu Ir Sais, DJ CHEEM y Chris Strick.

E ta trahando riba un proyecto actualmente, ‘Rum and Soca’, cu pronto lo sali hunto cu Freddy Rasta, un veterano pa loke ta trata e genero di soca.

E video di ‘Melanin’ a wordo graba y edita pa Michael Anthony Fowler y e single a wordo lansa bou di Sony Music Publishing y Palms Up Music Publishing.