Gulidó di bolita a haña dos luna di prizon na Hulanda

WILLEMSTAD – Otro krioyo ku a bai purba su suerte pa hiba venenu den forma di kokaina Hulanda i ku a kai for di momento ku el a pone pia na Schiphol, siman pasá a haña un kastigu di dos luna di prizon.

No ta promé biaha ku e ta hasi e chasko aki pasobra dia 31 di oktober aña pasá nan a bolbe gar’é ku 600 gram ku ela guli.

No kontentu ku e kastigu ku el a haña den promé instansia, el a apelá i den sierto sentido e tabatin suerte, pasobra Hues a bai ku man di felpa kune poniendo un sèt di kondishon i regla pe bandoná e bida drogadikto i alkoholiko ku el a bin ta hiba.

Den promé instansia un Hues Polisial a duné kastigu pasobra e delito no tabata asina pisá, pero den apelashon Hues tabata fuerte, pero ku kompashon. Su abogado a pidi pa lag’e den libertat, pasobra e investigashon dje kaso no tabatin base pero Hues a mand’é bai flit.

Repasando e fail dje bolitero, t’asina ku ora el a yega Schiphol for di Kòrsou, Marechaussee a par’e pa kontròl pasobra su ‘fashi’ tabata masha sospechoso.

Kombersando ku e krioyo e agentenan a ripara ku e tabata parse batí, e tabata soda pisá i ardu a bula den su wowonan.

Esei só ya kaba tabata indiká ku tabatin ‘something’ masha robes i ora nan a tèst e poeiroe, el a tèst positivo.

E prueba tabata legal i probá i no tabatin motibu pa lag’e bai ku un klap riba su man.

E homber a apelá, pasobra e Hues Polisial a kondené na 8 luna di prizon i den apelashon. Abogado General a pidi un kastigu di 240 dia di kual 104 kondishonal i un periodo di prueba di dos aña i, mashá importante, imponé kondishonnan ekstraordinario pa stòp ku e kos aki pa semper.

Korte di Hustisia a dikta sentensia teniendo na konsiderashon  ku el a guli komo 800 gram ku mester tabata pa bende ku otro hende loke ta dañino pa salú di hende.

KON TA FIHA KASTIGU

Den e kaso aki Korte a splika kon nan a yega ne kantidat di luna di kastigu. Primeramente e mester bai será pe kantidat ei.

Na di dos lugá tin instrukshon kuantu kastigu ta duna pa kuantu droga. Esei si ta entre 500 pa mil gram di kokaina ta duna kastigu inkondishonal di seis pa 8 luna.

Faktor ku a pisa t’e hecho ku den pasado el a yega di kai pe mesun hecho estando den su periodo di prueba. Di manera ku e kastigu ku Abogado General a pidi  ta muchu leve.

Sinembargo e tribunal sinembargo a tene kuenta ku e akusado a kuminsa drecha su bida.

Un rapòrt ku agentenan di Leger des Heils a traha dia 7 di juni ultimo ta bisa ku e ta kumpli ku su sitanan ku Reclassering, ku e tin kos di hasi útil den dia i no ta usa droga ni bebe alkohòl mas.

Pe motibu di Korte kier a suavisá e kastigu.

Pa stimulá e akusado pa sigi ku e bon trabou, pero alabes mustr’é ku loke el a hasi ta algu serio, Korte di Hustisia a disidi pa duné gran parti dje kastigu den forma kondishonal.