Huramentacion di Sevinger como miembro di Parlamento nada nobo. Papa Godett, Amador Nita y Stanley Brown den prison tambe a huramenta na Corsou

Benny Sevinger candidato number 29 riba lista di partido AVP, a logra un total di 1614 voto personal y  e cantidad aki a pone cu el a ricibi ‘voorkeurstemmen’ cu automaticamente e ta bira miembro di Parlamento di Aruba.

Manera ta conoci Benny algun siman prome cu eleccion di dia 25 di juni, a keda deteni pa Landsrecherche riba orden di Ministerio Publico relaciona cu e caso di Avestruz, caminda ta investigando maneho di e miembro di AVP tempo cu e tabata Minister di Infrastructura den Gabinete Mike Eman I y II.

Un detencion cu a lanta hopi duda riba e forma di procede di Ministerio Publico ya cu ta algun siman prome cu AVP a entrega lista di candidatonan,  abogado di Benny Sevinger a pidi claridad for di Ministerio Publico y aki Fiscal Mayor a sigura abogado David Kock, cu no tin ningun acusacion oficial ainda contra di e politico y mirando e desaroyonan, ta mustra cu ta te luna di september lo por t’asina leu pa mira si lo por formula un caso penal contra di e politico.

Pa sorpresa di tanto Sevinger, su famia y di partido AVP, ata asina cu Evelyn Wever Croes a entrega retiro di su Gobierno na luna di maart ultimo, Ministerio Publico cu a sigura cu e caso lo mira mas claridad te cu luna di september, a dicidi di actua y a cuminsa detene sospechosonan den e caso di Avestruz y eventualmente a detene Benny Sevinger tambe.

AVP ta kere den inocencia di Benny Sevinger y a postula e politico como ultimo riba lista di partido y ora cu Landsrecherche a detene Benny, esaki no a cambia y apesar di tur intento y hopi critica, Ministerio Publico no a permiti Sevinger  bandona prison prome cu eleccion.

Benny a pasa eleccion den KIA como sospechoso, ya cu ainda no tin ningun acusacion oficial contra di su persona y mientras cu siman pasa a alarga su detencion cu 60 dia mas, Benny cu a saca su mes den eleccion pa Parlamento, lo tin cu huramente diabierne otro siman, mientras cu ainda e ta deteni.

Esaki lo sosode dilanti di Gobernado den un sesion special y e acto aki lo tuma lugar otro siman diabierna y esaki no ta algo nobo den politica.

LIBERTAD

Benny Sevinger lo no bira e prome politico cu lo wordo huramenta siendo den prison, ya cu despues di disturbionan formal na Corsou dia 30 di Mei di 1969, tres politico renombra den historia di Corsou, a wordo huramente pa Gobernador di Antiyas, Cola Debrot, siendo cu nan tabata den prison.

Ta trata aki di Papa Godett, Stanley Brown y Amador Nita, kendenan despues di e disturbionan na 1969, a dicidi di lanta nan partido politico cu e nomber di Frente Obrero Liberacion FOL, mientras cu nan tabata den prison pa motibo di fomenta discordia y desorden den Willemstad.

Despues cu nan a wordo huramenta, tur tres a wordo laga liber y nan por a drenta Parlamento di Antiyas y sigui cu nan trabou.

Kico lo pasa cu Benny Sevinger otro siman ainda no ta conoci, esta cu mescos den caso di Godett, Brown y Nita na 1969 na Corsou, kendenan a wordo laga den libertad despues cu nan a huramenta, cu esaki tambe lo bay t’e caso  cu e politico di AVP.