Korte a imponé litania di kondishon pa bolitero ku a kai den periodo di prueba

WILLEMSTAD – Aña pasá Ministerio Publiko a pidi un kastigu di prizon kondishonal di dos luna pe kompai krioyo ku a bai pasa ku bolita na dos okashon i a kai tur dos biaha.

El a kai di dos biaha, pasobra e tabata mustra visiblemente kansá, e tabata soda profusamente i su wowonan tabata tur kòrá sea di uso di droga of di alkohòl.

Pe di dos biaha aki Abogado General den Korte di Hustisia na Amsterdam a tabatin pas ku e demanda di seis luna i solamente kier a mira e periodo di prueba un aña mas largu, pasobra e ta dilanti di Hues ya ku el a kai den su periodo di prueba.

Esei ta nifiká ku e pida kastigu kondishonal di e promé kondena e tin ku kumpli kune. Esei ta pe no kere ku ta chansa tin.

E kondena ku a kai ta 12 luna  di kual mitar ta kondishonal a menos ku e bolbe faya den e periodo di prueba i e ninga di koperá ku outoridatnan pa laga traha un sédula di identidat  ku su fingerprint.

Pero pa e trato humano aki e tin ku kumpli ku un litania di kondishon ora e ta liber atrobe.

Asina ta ku e mester mèldu kuantu biaha ku ta nesesario na ofisina di Reclassering .

Ademas e tin ku kumpli ku un sèt di kondishonnan ekstraordinario.

Denter di 5 dia despues ku e kaba di sinta su kastigu e tin ku mèldu na ofisina di Reclassering di Leger des Heils na Amsterdam i durante dos aña largu e tin di mèldu.

E yu’i Kòrsou mester mèldu na e instituto di rehabilitashon Fivoor of un instituto similar kaminda Reclasssering mand’é.

E tratamentu mester kuminsa mesora despues ku e sali liber i e tin ku respetá reglanan di kas i sigi  instrukshonnan ku su supervisor duné.

Si nan duné remedi, e mester bebe esakinan.

Reclassering ta disidi den kua dje sentronan di rehabilitashon e ta keda asina e Sali for di prizon i durante henter su periodo di prueba.

E mester someté su mes na kontròl riba uso di alkohòl i droga i mester koperá pa duna urina i supla den blas tantu biaha ku ta nesesario.

E tin ku koperá pa pa paga su debenan den kuadro di Wet Schuldsanering Natuurlijke Personen.

E tin ku duna Reclassering henter su selashi personal i finansiero i kuantu debe e tin.

E tin ku traha minimo 24 ora pa siman i ta outorisa Reclassering pa kontrolá su pasonan. I manera a bisa kaba, e mester kaba di sinta e anterior kastigu di dos luna na kual a kondená promé biaha ku ela kai ku droga na aeropuerto Schiphol.