Ora bo yiu yega cas cu su raport…

Bo yiu ta den e ultimo simanan di scol y bo yiu ta haya su raport… Dianan cu bastante tension pa mayoria mucha y mayor. Un mal raport no mester bin como sorpresa. Durante e aña escolar bo por ripara y haya señalnan. P’e motibo aki ta importante pa sigui bo yiu su prestacion y sosten’e durante henter e aña escolar.

Con abo ta reacciona ora bo yiu yega cas cu su rapport?

“Bunita raport, pabien pero mi no a spera otro”.

Tin mucha cu semper ta haya un bon raport. Pero un bon raport no ta bin di mes. Corda cu e mucha a traha pe. Miho bisa: …”Waw, bunita! Abo a logra esaki, hopi bon!

“Bon trabou! Ata 50 florin pa bo cumpra algo!”

Recompensa un mucha cu placa pa su bon rapport no ta mal idea, pero e ta envolvi risico. Mucha por cuminsa siña pa haya placa. Ora no tin placa, no ta presta. Mihor dun’e un regalo creativo of educativo manera un wega di mesa, un set di verf cu kwashi of dune un sorpresa di bay come cu ne na un restaurant. No lubida di dun’e un brasa di elogio!

“B’a wak…mi tabata sa! Unda bo kier bay cu un raport asina?”

Aunke con bon of malo e raport ta, semper cuminsa wak loke ta bon. Despues sigui cu e puntonan menos bon y puntra dicon. Laga bo yiu splica su raport y purba wanta bo opinion te ora e caba di splica.

“Lubida vakantie!…Bo ta bay haci rekenen tur dia!”

Menasa y straf no ta yuda ora e raport sali malo. Un reaccion asina ta haci siñamento bira un straf p’e mucha. Tuma contacto cu e maestra di scol y purba compronde dicon esaki a sosode. Laga bo yiu bin cu ideanan con e por mehora su raport (p.e tur diabierna den vakantie mi ta lesa un buki). Asina bo ta haci e mucha responsabel pa su comportacion y prestacion. Djis mand’e bay haci rekenen, no ta funciona. E lo bai hunga asina cu e haya chens.

“Si bo a haci bo best, mi lo a duna bo un celular.”

Esaki ta un reaccion peligroso. Imagina cu bo yiu a haci su best y el a haya un 6 pa rekenen. Bo ta dun’e e celular of no? Si bo kier duna bo yiu un recompensa, haci’e pa su esfuerso.

“Wak e raport di bo ruman, e si a haci su best!”

Mihor puntra bo mes un rato kico ta un mal raport pa bo yiu. Maske abo no gusta su raport, podise p’e e no ta dje malo ey. No compara su raport cu esun di su ruman of otro mucha sino cu loke bo yiu por (su capacidad), su raport anterior (tin crecemento?) y su esfuerso (con duro bo yiu a traha?).

“Haci bo best, esey ta bon pa bo futuro”.

E reaccion aki no ta motiva e mucha. Futuro ta algo dificil pa bo yiu imagina. Splic’e pakico e mester por haci rekenen of pakico e mester por lesa. Si e mucha compronde esey, e lo haya mas gana pa haci su best.

Tanto mayor como mucha ta sinti emocion ora haya raport. E prome reaccion por ta contento, desapunto, alivio of rabia. Pero semper mester busca un manera pa sigui pa dilanti. Zundra y parti straf ta baha e auto estima di bo yiu y no ta siñ’e carga responsabilidad pa su propio futuro. E capacidad di bo yiu hunto cu su esfuersonan ta loke ta conta.

Cuminsa cu scucha bo yiu. Si su raport ta malo, puntre si e por splica dicon y con e mes ta sinti di esaki. Puntr’e kico mester cambia p’e mehora su raport y sosten’e mas tanto posibel. Elogi’e pa loke el a haci bon. Esaki ta yud’e mantene su auto confiansa y purba atrobe. 

Fundacion Pa Nos Muchanan ta desea tur mucha un dushi vakantie!

Fuente: basa riba articulo: “Geen straf bij slecht rapport” www.goedgevoel.be y www.klasse.be/ouders
Pa informacion of pregunta por acerca Fundacion Pa Nos Muchanan – Cumana 2Tel: 5834247/5880856 – Whatsapp: 6998900
E-mail: info@fpnm.aw – Website: www.fpnm.aw