Presidente di CSE, Glenn Thode a ricibi menasa ayera mainta

Ayera mainta Presidente di Conseho Electoral, drs. Glenn Thode no a duna oido n’e peticion di varios ciudadano pa haci un reconteo di votonan declara invalido y no kier a scucha ningun reclamo di ningun hende.

Varios ciudadano den ultimo dianan a bin ta mustra cu nan a vota na cierto urna electoral, pero e candidaton pa kende nan a deposita nan voto, ta aparece riba resultado entrega pa Censo, cu e  candidato en cuestion no a ricibi ningun voto n’e urna ey.

Partido AVP ayera mainta a entrega un lista cu mas di 3000 ciudadano cu ta pidi un reconteo di e votonan invalido, pero na prome lugar drs. Rene Herde kende a bay pa entrega e lista di firmantenan, a wordo nenga pa drenta paden ya cu supuestamente e lugar ta mucho chikito.

Glenn Thode como Presidente di Conseho Electoral a participa cu e no ta mira motibo pa un reconteo di votonan ya cu e proceso aki ya a wordo haci p’e conseho y como tal e resultado lo keda igual manera a bira conoci caba den fin di siman.

E decision di e conseho y despues e declaracion di Presidente Thode, a crea ainda mas iritacion den comunidad ya cu ayera mainta no ta solamente 10 partido a mustra nan preocupacion riba e forma di procede di e Conseho Electoral, pero hasta den seno di partido MEP cu a gana e eleccion, tin cierto duda a lanta cabes pa un resultado di votonan personal cu no tin ni pia ni cabes.

Ta un misterio y duda grandi con bin Dangui Oduber, kende a hiba un campaña amplio y hopi efectivo, mucho mas grandi cu cualkier campaña anterior, a bay atras den voto personal, mientras cu durante mas cu dos luna, Dangui su nomber tabata ser mira tur caminda, den tur bario y riba centenares di auto.

Na momento cu Dangui a bay emiti su voto diabierno ultimo, el a impresiona tur hende cu e cantidad di hende cu a compaña su persona p’e bay vota y esaki a wordo comenta henter atardi, pero pa dialuna bin sali na cla cu el a bay atras den voto, tabata algo sumamente sorprendente.

Den curso di e ultimo dianan aki ainda por mira cantidad di auto cu sticker di Dangui riba nan windshield coriendo rond y p’e bay atras den su cantidad di votonan compara cu 2017, ta un misterio grandi, pero na mes momento e ta lanta dura den credibilidad di e proceso electoral aki.

Glenn Thode desde cu el a yega Aruba pa bin atende cu e Conseho Electoral cual e ta presidi, su persona tabata envolvi den cantidad di conflicto caminda a trata di introduci cambionan cu ta rekeri un periodo mucho mas largo pa tur hende compronde y tambe hasta por bisa cu el a envolvi su mes den asuntonan politico partidista, creando e impresion aki ora cu e tabata semper den huki di Prome Minister Eveln Wever Croes, lider di MEP.

Den proximo dianan Glenn Thode lo regresa Hulanda caminda e ta bibando  y trahando y e expectativa grandi den comunidad, ta cu e lo entrega su retiro como Presidente di Conseho Electoral y keda leu den futuro di cualkier eleccion aki na Aruba, ya cu e no ta laga ningun bon impresion atras.

P’e ocasion aki ta bon corda riba un di e cancionnan mas popular di e gran artista Arubiano, Padu del Caribe, kende su cancion a bisa: “A yega e ora pa despedi, a yega e ora pa bisa ayo,” y den e caso di Glenn Thode, realmente a yega e ora pa bisa ayo.