Si no tin coalicion pa otro siman diabierna, Mervin Wyatt Ras lo bira Presidente di Parlamento

Deliberacionnan entre partidonan cu a logra asiento den eleccion di diabierna ultimo, ta tumando lugar, mientras cu sea awe of den proximo dianan, Gobernador lo nombra un informador cu lo sigui delibera cu e partidonan den su nomber.

Ta despues di sinta reuni cu e partidonan, e informador lo entrega su raport na Gobernador, kende e ora lo tin cu nombra un formador p’asina hinca un Gobierno di coalicion den otro, pero sin por tin un acuerdo prome cu esey entre un of mas partido pa sostene un Gobierno di coalicion, henter e trabou di informador ta termina mesora.

Sinembargo por surgi un situacion caminda su dado caso e informador y evencual formador lo no logra na cumpli cu nan mision di tin un acuerdo di gobernacion entre dos of mas partido, e proceso di huramenta e miembronan eligi di Parlamento, lo contiuna diabierna otro siman, caminda nan lo wordo huramenta, si tin Gobierno of no tin Gobierno.

Sinembargo cu e situacion cu tin n’e momentonan aki, e posibilidad ta grandi cu si no tin un acuerdo di gobernacion, Parlamento lo mester vota pa un Presidente nobo, pero debi cu no tin acuerdo ainda, e posibilidad ta grandi cu esaki lo por ta posibel y e ora lo bay over segun reglanan existente, pa nombra un miembro di Parlamento nobo, cu tin mas aña di servicio den e Conseho Legislativo aki.

Den e caso di e grupo di Parlamentarionan cu a wordo eligi diabierna ultimo, ta Mervin Wyatt Ras t’esun cu ta cumpli cu e exigencia aki y como tal e lo por bira Presidente di Parlamento pa algun dia te ora cu tin un coalicion forma y e ora lo bolbe bay over na cambia e Presidente.

Sinembargo e posibilidad ta existi cu principalmente partido MEP lo no permiti esaki pasa y lo trata di yega na un acuerdo cu e partidonan cu a logra asiento, mas pronto posibel y lo no kier tuma e riesgo aki, di tin un miembro di faccion di AVP como Presidente di Parlamento.

Diabierna otro siman lo ta ultimo dia di trabou di Ady Thijssen den su calidad como Presidente ya cu e no por sigui den e puesto aki, mirando cu e no a wordo eligi pa ta den Parlamento e proximo periodo y como Presidente e persona cu ta ocupa e puesto aki, tambe mester ta miembro eligi di e conseho.

Vice Presidente Alan Howell tambe lo bandona e cargo aki of practicamente a bandona e cargo aki caba for di despues di resultado di eleccion a bira conoci, pero e lo keda Parlamentario te otro siman ora cu e constelacion nobo tuma over.

Howell tabata Parlamentario pa su partido POR, pero e partido no a logra saca asiento diabierna ultimo.