Tienda di Educacion cu orario nobo di servicio telefonico via 161 entrante 1 juli 2021

Tienda di Educacion ta existi pa 9 aña brindando servicio gratis na henter comunidad di Aruba. Tin varios servicio cu ta wordo duna pa nos expertonan ora ta trata sosten y guia na mayor.

Nos servicionan ta consisti di duna charla, tayer of informacion na diferente scol y tambe gruponan meta. Un otro servicio cu nos di Tienda di Educacion ta brinda ta sosten y guia telefonico via 161.

Mayor of educador por tuma contacto cu nos pa cualkier pregunta ora ta trata lantamento di un mucha. Tambe si ta desea un conseho con pa comunica of disciplina un yiu.

Por yama of bishita nos tambe pa un consulta gratis na nos oficina situa den edificio di Centro pa Hoben y Famia adres Wayaca 68-C.

Entrante awe 1 juli 2021 nos servicio telefonico di 161 ta conoce un cambio den orario. E servicio di 161 ta disponibel, desde e fecha menciona, di dialuna pa diabierna di 8 am – 7 pm non-stop p’asina por sigui brinda e bon servicio manera semper.

Por comunica cu nos tambe via info@tdearuba.com, bishita nos pagina di Facebook y YouTube channel of subi ariba nos website www.tdearuba.com pa mas informacion.

Nos di Tienda di Educacion ta pone enfasis riba educacion di un yiu. Un sonrisa den cara di nos yiu por haci milager. P’esey ta importante pa mayor of educador trece alegria pa nos yui(nan) por tin un infancia sano y desaroya positivamente.

Nos ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta. Tur yamada na 161 ta anonimo.

Bienestar y siguridad di nos muchanan ta responsabilidad di nos tur! Ban cuida y lanta nos muchanan cu hopi amor y compasion pa asina crea futuro generacion sano y di bon boluntad. Ta un bon ehempel pa nos muchanan y haci un diferencia positivo den nan bida.